كانۆون-2024: تۋىمىزدى كوتەرىپ شىعۋ ۇلكەن جاۋاپكەرشىلىك - ەراسىل شىڭعىسحان
استانا. KAZINFORM. بۇگىن وڭتۇستىك كورەيانىڭ كانۆون قالاسىندا وتەتىن جاس وسپىرىمدەر اراسىندا IV قىسقى وليمپيادا ويىندارىنا ۇلتتىق قۇراما ويىنشىلارىن رەسمي شىعارىپ سالۋ ءراسىمى ءوتتى.
وسى ورايدا IV قىسقى جاستار وليمپياداسىنىڭ اشىلۋ سالتاناتىندا ەلىمىزدىڭ كوك تۋىن ۇستاپ شىعاتىن سپورتشىلارىمىزدىڭ ءبىرى - شورت-ترەكشى ەراسىل شىڭعىسحانمەن شاعىن سۇحبات الۋدىڭ ءساتى ءتۇستى.
- ەراسىل جاڭا عانا قر تۋريزم جانە سپورت ءمينيسترىنىڭ قولىنان ەلىمىزدىڭ كوك بايراعىن الدىڭ. قانداي سەزىمدەسىڭ ؟
- بۇل مەن ءۇشىن ۇلكەن ابىروي ەكەنىن ايتقىم كەلەدى. سونداي-اق، ماعان جۇكتەلگەن ۇلكەن مىندەت دەپ بىلەمىن. ءسال قوبالجۋ دا جوق ەمەس. وليمپيادا ويىندارىندا ەلىمىزدىڭ بايراعىن قالاي كوتەرىپ شىقسام، جارىستاردا جەڭىس تۇعىرىنان كورىنىپ، ەلىمىزدىڭ تۋىن سولاي جەلبىرەتىپ قايتۋ باستى ارمانىم. جالپى، تۋىمىزدى الىپ شىعۋ - مەنى جەڭىسكە جەتەلەيدى دەگەن ۇمىتتەمىن.
- وليمپيادا ويىندارىندا تۋدى كەز-كەلگەن سپورتشىعا سەنىپ تاپسىرا سالمايدى. وسى ورايدا تاڭداۋ قالاي وزىڭە تۇسكەنىن ايتىپ وتسەڭ؟
- نەگىزى، وليمپيادا ويىندارىندا ەلىمىزدىڭ تۋىن الىپ شىعامىن دەگەن ويىمدا بولماعان. وسىلاي تاڭداۋ جاسالعانىن باپكەرىمنەن ەستىگەندە نە ايتارىمدى بىلمەي قالدىم. ەڭ باستىسى وسىعان دەيىنگى جەتىستىكتەرىمدى ەسكەرە وتىرىپ، سونداي-اق، الداعى ويىنداردان ۇلكەن ءۇمىت كۇتەتىندىكتەن تاڭداۋدىڭ ءبىرى ماعان بۇيىرعان بولار دەپ ويلايمىن.
- وسىعان دەيىن قانداي جەتىستىكتەرگە قول جەتكىزدىڭ ؟
- شورت-ترەكتەن سپورت شەبەرىنە كانديداتپىن، ءوز قۇربىلاستارىم اراسىندا قازاقستان چەمپيونى اتاندىم. سونداي-اق، حالىقارالىق جارىستاردا دا ۇزدىكتەر قاتارىنان كورىنىپ كەلە جاتىرمىن. «ازيا بالالارى-2023» حالىقارالىق جارىسىندا كۇمىس جۇلدەگەر اتاندىم. باسقا دا جارىستاردا جاقسى ناتيجە كورسەتىپ كەلەمىن. ەندى، وليمپيادا ويىندارىندا جۇلدە العىم كەلەدى.
- وليمپيادا ويىندارىنا دايىندىعىڭ قالاي؟
- وليمپياداعا سوڭعى وقۋ-جاتتىعۋ جيىندارىن استانادا «الاۋ» مۇز سارايىندا وتكىزدىك. دايىندىعىم وتە جاقسى. قازىر بابىمدامىن دەپ ايتا الامىن.
- شورت-ترەك سپورتىمەن اينالىسقالى قانشا ۋاقىت بولدى ؟
- شورت-ترەكپەن اينالىسىپ كەلە جاتقانىما بيىل تۋرا 7 بولادى. بۇل سپورت ءتۇرىنىڭ بارلىق قىر-سىرىن مەڭگەرىپ بولدىق. ەندى تەك، جارىستاردا ەلىمىزگە مەدال سىيلاۋ عانا قالدى.
- الداعى وليمپيادا ويىندارىندا باستى قارسىلاستارىڭ قاي ەلدىڭ سپورتشىلارى بولۋى مۇمكىن؟
- ەڭ باستى قارسىلاستارىمىز ارينە مۇز ايدىن يەلەرى كورەيالىقتار ەكەنى داۋسىز. سونداي-اق قىتايلىقتار دا بىزگە ۇلكەن قارسىلاس اتانا الادى. جالپى، وليمپياداعا بارعان بارلىق كوماندالار ءبىزدىڭ ەڭ مىقتى قارسىلاستارىمىز.
- بەيجىڭ قىسقى وليمپياداسىندا سپورتشىلار وزدەرىنە تاراتىلعان ۇلتتىق قۇرامانىڭ فورماسىنىڭ ساپاسىز ەكەنىن ايتقانى ەسىمىزدە قالعان ەدى. ال سىزدەرگە تاراتىلعان فورما تۋرالى نە ايتا الاسىز؟
- بۇل فورما ماعان قاتتى ۇنادى. ىڭعايلى، جەڭىل، جىلى ەكەن. ءتۇسى دە كوڭىلىمنەن شىقتى.
- اڭگىمەڭە راحمەت! جەڭىسپەن ورالۋلارىڭىزدى تىلەيمىز.
اۆتوركۇنسۇلتان وتارباي
