كانۆون-2024: قازاقستاندىق سپورتشىلار جاسوسپىرىمدەر وليمپياداسىنا اتتاندى
استانا. KAZINFORM - ەلوردادا وتاندىق سپورتشىلاردى وڭتۇستىك كورەيادا وتەتىن IV قىسقى جاسوسپىرىمدەر وليمپياداسىنا شىعارىپ سالۋ ءراسىمى ءوتتى.
«قۇرمەتتى سپورتشىلار، سىزدەر بارلىق كەزەڭدەردەن سۇرىنبەي ءوتىپ وڭتۇستىك كورەيانىڭ كانۆون قالاسىندا وتەتىن IV قىسقى جاسوسپىرىمدەر وليمپياداسىنا ەلىمىزدىڭ نامىسىن قورعاۋعا اتتانعالى تۇرسىزدار. الەمدەگى جەتەكشى سپورتشىلاردىڭ قاتارىنا كىرە الدىڭىزدار»، - دەدى تۋريزم جانە سپورت ءمينيسترى ەرمەك مارجىقپايەۆ سالتاناتتى شارادا.
ءمينيستردىڭ مالىمەتىنشە، ەلىمىز تاۋەلسىزدىك العالى جاسوسپىرىمدەر وليمپياداسىندا 29 مەدال جەڭىپ الدى، ونىڭ 5- قىسقى وليمپيادادان.
«ەلىمىزدە قىسقى سپورتتاردىڭ ءوز ءداستۇرى بار. بۇگىندە تەك ەلىمىزگە عانا ەمەس، بۇكىل الەمگە تانىمال داڭقتى سپورتشىلارىمىز حالىقارالىق قىسقى جارىستاردا ونەر كورسەتىپ، ۇنەمى جۇلدەگەرلەر قاتارىنان كورىنىپ كەلەدى. ولاردىڭ قاتارىندا شاڭعىشى ۆلاديمير سميرنوۆ، كونكيمەن جۇگىرۋشى ليۋدميلا پروكاشيەۆا، بياتلونشى ەلەنا حرۋستاليەۆا، مانەرلەپ سىرعاناۋشى ەليزاۆەتا تۇرسىنبايەۆا بار. سىزدەر حالىقارالىق سپورت دوداسىنا قاتىسا وتىرىپ، زور تاجىريبە جينايسىزدار»، - دەدى ۆەدومستۆو باسشىسى.
ەستەرىڭىزگە سالا كەتەيىك، IV قىسقى جاسوسپىرىمدەر وليمپياداسى بيىل 19-قاڭتار مەن 1-اقپان ارالىعىندا وڭتۇستىك كورەيانىڭ كانۆون قالاسىندا وتەدى.
قازاقستاننىڭ سپورت دەلەگاتسياسى قۇرامىندا سپورتتىڭ بەس تۇرىنەن 42 سپورتشى بار.
ايتا كەتسەك، جاسوسپىرىمدەر وليمپياداسىندا قازاقستان تۋىن «ۇلتتار شەرۋى» كەزىندە قازاقستان تۋىن كونكيمەن جۇگىرۋدەن پەتروپاۆلدان ۇلتتىق قۇرامانىڭ مۇشەسى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان الىپ شىعادى.
قازاقستان جاسوسپىرىمدەر اراسىنداعى قىسقى وليمپيادا ويىندارىنا 2012 -جىلدان بەرى قاتىسىپ كەلەدى. جالپى، ەلىمىز ءۇش قىسقى جاسوسپىرىمدەر وليمپيادا ويىندارىنا قاتىسىپ، ەكى كۇمىس جانە التى قولا مەدال جەڭىپ الدى.
اۆتور
داۋلەت ىزتىلەۋ
