كانۆون-2024: قازاقستان قۇراماسى وليمپياداعا قايدا دايىندالىپ جاتىر
وڭتۇستىك كورەيانىڭ كانۆون قالاسىندا وتەتىن IV قىسقى جاسوسپىرىمدەر وليمپياداسىنا قاتىساتىن جاس جەتكىنشەكتەرىمىز قىزۋ دايىندالىپ جاتىر، دەپ حابارلايدى Kazinform.
شاڭعىمەن تۇعىردان سەكىرۋدەن قازاقستان كومانداسى قازىرگى تاڭدا الماتى قالاسىندا جاتتىعۋىن جالعاستىرىپ جاتسا، حوككەيدەن قازاقستان جاسوسپىرىمدەر كومانداسى كانۆونداعى قىسقى ويىندارعا دايىندىقتى استاناداعى «بارىس ارەنا» ستاديونىندا جاتتىعۋدا. ال بياتلوننان IV- قىسقى جاسوسپىرىمدەر وليمپياداسىنا قاتىساتىن سپورتشىلارىمىز اقمولا وبلىسى، شۋچينسك قالاسىنداعى قىسقى وليمپيادالىق دايارلاۋ ورتالىعىندا وقۋ- جاتتىعۋ جيىنىن وتكىزىپ جاتىر.
تاۋ شاڭعىسىنان قازاقستان كومانداسىنىڭ جاتتىقتىرۋشىسى مارك شپاربەرگ كانۆونداعى جاسوسپىرىمدەر وليمپياداسىنا قاتىساتىن سپورتشىلاردى يتاليادا جاتتىقتىرىپ جاتقانى بەلگىلى بولدى.
ول باق وكىلدەرىنە بەرگەن سۇحباتىندا:
«بىلتىر ءبىز سپورتشىلاردى يتالياعا جىبەرۋ تۋرالى جوبانى قولعا الدىق. الەكساندرا سكوروحودوۆا سول جاقتا تۇراقتاپ، حالىقارالىق كوماندا قۇرامىندا دايىندالۋدا. كەزىندە مەن دە سول جەردە جاتتىققانمىن. كانۆونداعى جاسوسپىرىمدەر وليمپياداسىنا قاتىساتىن سپورتشىلاردى ءبىز ۇزدىك ناتيجەلەرى بويىنشا تاڭداپ الدىق. ادىلەتتى تاڭداۋ جاساعانىمىزعا سەنىمدىمىن»، - دەگەگەن باپكەر.
ەستەرىڭىزگە سالا كەتەيىك، وڭتۇستىك كورەياداعى جاسوسپىرىمدەر وليمپياداسىندا قازاقستان نامىسىن سپورتتىڭ 5 ءتۇرى مەن 10 ديستسيپلينا بويىنشا 42 سپورتشى قورعايدى.
اتاپ ايتار بولساق، بياتلون، كەرلينگ، كونكيمەن جۇگىرۋ، شورت-ترەك، شايبالى حوككەي، شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، فريستايلدان پاراللەلدى موگۋل بويىنشا باق سىنايدى.
كانۆونداعى قىسقى جاسوسپىرىمدەر وليمپياداسى 19-قاڭتار مەن 1-اقپان ارالىعىندا وتەدى. اتالعان جارىسقا الەمنىڭ 50 مەملەكەتىنەن 1800 سپورتشى قاتىسادى. 7 سپورت تۇرىنەن (15 ديستسيپلينا) 81 مەدال جيىنتىعى ساراپقا سالىنادى.
وليمپيادانىڭ اشىلۋ سالتاناتىندا قازاقستان تۋىن كونكيمەن جۇگىرۋدەن پەتروپاۆلدان ۇلتتىق قۇرامانىڭ مۇشەسى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان الىپ شىعادى.
