كانۆون-2024: كەرلينگتەن وتانداستارىمىز قارسىلاستارىن ءبىرىنشى رەت ءىرى ەسەپپەن ۇتتى

كانۆون. KAZINFORM - بۇگىن وڭتۇستىك كورەيانىڭ كانۆون قالاسىندا ءوتىپ جاتقان جاس وسپىرىمدەر وليمپياداسىندا كەرلينگتەن ارالاس جۇپتىق باسەكەدە جەرلەستەرىمىز ءبىرىنشى رەت قارسىلاستارىن ءىرى ەسەپپەن ۇتتى.

وسى ورايدا بىردەن ايتا كەتەيىك، قازاقستاندىق سپورتشىلار كەرلينگتەن قىسقى جاس وسپىرىمدەر وليمپياداسىندا ءبىرىنشى رەت ونەر كورسەتىپ جاتىر. سونداي-اق، بۇگىنگى جەڭىسى - وسى وليمپيادا ويىندارىنىڭ توپتىق كەزەڭىندەگى العاشقى ءىرى جەڭىسى.

بۇگىن ەل نامىسىن قورعاعان مەرەي تاستەمىر مەن يبراگيم تاستەمىر جۇبى يتاليا قۇراماسىن 10:2 ەسەبىمەن قاپى قالدىردى.

ەرتەڭ استانا ۋاقىتى بويىنشا 9:30 دا قۇرامامىز شەشۋشى ويىندى دانياعا قارسى وتكىزەدى.

ەستەرىڭىزگە سالا كەتەيىك، وسىعان دەيىن قازاقستاندىق كەرلينگ شەبەرلەرى شۆەيتسارياعا 1:9 ەسەبىمەن جول بەرسە، اۋستريا قۇراماسىنان 4:5 ەسەبىمەن ۇتىلدى. ال گەرمانيالىق قۇرداستارىنا قارسى سىندا 4:8 ەسەبىمەن ەسە جىبەردى.

ايتا كەتەيىك، وڭتۇستىك كورەياداعى جاس وسپىرىمدەر وليمپياداسىندا قازاقستان نامىسىن سپورتتىڭ 5 تۇرىنەن 10 ديستسيپلينا بويىنشا 41 سپورتشى قورعاپ جاتىر.

كانۆوندا قىسقى جاس وسپىرىمدەر وليمپياداسىنىڭ الاۋى 19- قاڭتار كۇنى تۇتانعان بولاتىن. جارىس 1- اقپاندا مارەسىنە جەتەدى.

اۆتور كۇنسۇلتان وتارباي