كانۆون-2024: بۇگىن قازاقستاندىق سپورتشىلار قالاي ونەر كورسەتتى

استانا. KAZINFORM - وڭتۇستىك كورەيادا ءوتىپ جاتقان قىسقى سپورت تۇرلەرىنەن IV قىسقى جاس وسپىرىمدەر وليمپياداسىنىڭ بەسىنشى جارىس كۇنى قازاقستان قۇراماسىنىڭ قورجىنى تاعى ءبىر مەدالمەن تولىقتى.

ناتيجەسىندە قازاقستان جالپى مەدالدار كەستەسىندە ءبىر ساتى جوعارلاپ، 15-ورىنعا قول جەتكىزدى. ەندى بۇگىنگى جارىس كۇنىنە قىسقاشا شولۋ جاساپ وتسەك.

حوككەيدەن (3×3) ۇلتتىق قۇراما كانۆون وليمپياداسىنىڭ قولا مەدالىن جەڭىپ الدى. جۇلدە جولىنداعى ماتچتا ءبىزدىڭ كوماندا اۋستريا قۇراماسىنان باسىم ءتۇستى. ەسەپ: 6:5 (4:1، 1:2، 1:2).

باسەكەنىڭ باس جۇلدەسىن لاتۆيا جەڭىپ السا، كۇمىس جۇلدە دانياعا بۇيىردى.

كونكيمەن جۇگىرۋدەن ارالاس كوماندالىق ەستافەتادا ۇلتتىق قۇراما سپورتشىلارى جارتىلاي فينالدا قاتەلىك جىبەرىپ (رۋسلان ءجانادىلوۆ، كريستينا شۋمەكوۆا) اقتىق سىنعا شىعا المادى. مۇندا قىتاي قۇراماسى جەڭىمپاز اتاندى. كۇمىس وڭتۇستىك كورەيا، قولا نيدەرلاند سپورتشىلارىنىڭ ەنشىسىندە كەتتى.

ەرتەڭ شەشۋشى جارىس ماسس-ستارتتا كريستينا جانە الينا شۋمەكوۆالار، رۋسلان ءجانادىلوۆ، ميحايل ماتريۋحين ەلوردا ۋاقىتىمەن 8:30 دا مۇز ايدىنىنا شىعادى.

تاۋ شاڭعىسىنان سلالومدا الەكساندرا سكوروحودوۆا مارەگە 1:40.34 سەكۋندتا كەلىپ، 9-ساتىعا تۇراقتادى. اۋستريا قۇراماسىنىڭ وكىلى مايا ۆاروشيتس (1:37.49) چەمپيون اتانسا، شارلوتتا گراندينگەر (گەرمانيا، 1:38.08) كۇمىس، دجوردجيو كولومب (يتاليا، 1:38.46) قولانى مىسە تۇتتى.

روستيسلاۆ حوحلوۆ ۇلدار اراسىندا 19-ورىننان كورىندى (1:46.38). التىندى ۇلى بريتانيا اتلەتى زاك كەرريك-سميت (1:38.61) جەڭىپ السا، ودان كەيىنگى ساتىعا ەلليوت ۆەستلۋند (شۆەتسيا، 1:38.66) پەن نەش حۋوت-مارشان (فرانسيا، 1:38.87) جايعاستى.

ەرتەڭ تاۋ شاڭعىسىنان ارالاس كوماندالىق ەستافەتا وتەدى. جارىس استانا ۋاقىتىمەن تاڭعى 8:00 دە باستالادى.

سونداي-اق ەرتەڭ پاراللەل فريستايل-موگۋلدا يۋليا فەكليستوۆا مەن دەنيس راسترۋبا ەل نامىسىن قورعايدى. جارىس 10:00 دە وتەدى.

قازىر قازاقستان جالپى ەسەپتە 1 التىن، 2 قولا مەدالمەن 15-ساتىدا تۇر. ازيا قۇرلىعىندا العاش رەت ءوتىپ جاتقان كەشەندى جارىس قازىردىڭ وزىندە قازاقستان ءۇشىن تاريحي ناتيجەمەن ەستە قالدى. وسىعان دەيىنگى ويىنداردا وتانداستارىمىز چەمپيون اتانباعان ەدى.

ايتا كەتەيىك، وڭتۇستىك كورەياداعى جاسوسپىرىمدەر وليمپياداسى 1- اقپاندا مارەسىنە جەتەدى.

اۆتور كۇنسۇلتان وتارباي