كانادانىڭ جاڭا پاسپورتى ساياحاتشىلاردىڭ ارمانىنا اينالدى
استانا. KAZINFORM – كانادانىڭ پاسپورتى - الەمدەگى ەڭ قورعالعان جانە قۇرمەتتى قۇجاتتاردىڭ ءبىرى. ال بۇل قۇجاتتىڭ جاڭارتىلعان نۇسقاسى الەمنىڭ تۇكپىر-تۇكپىرىندەگى ساياحاتشىلاردى ءتانتى ەتتى.
Instagram-دا كانادانىڭ جاڭا پاسپورتىنىڭ ەرەكشەلىگى كورسەتىلگەن ۆيدەو پايدا بولدى. ۆيدەونىڭ استىنا «كانادالىق پاسپورت جارىققا جانادى» دەگەن جازبا قالدىرىلعان. بۇل روليك جەلىدە جىلدام تاراپ كەتتى جانە 7 ميلليونعا جۋىق قارالىم جينادى.
ۆيدەودان پاسپورتتىڭ پاراقتارىن جاساۋ كەزىندە ەرەكشە تەحنولوگيا قولدانىلعانىن بايقاۋعا بولادى. وعان ارنايى جارىق تۇسكەن كەزدە ولار جانادى. بۇل اسەر كوپشىلىكتى تاڭعالدىردى: ونى جەلى قولدانۋشىلارى ادەمى جانە ەرەكشە سانادى.
پاسپورتتاعى جاناتىن سۋرەتتەر ونى ادەمى ەتىپ قانا قويماي، سونداي-اق قۇجاتتى قورعاۋدىڭ جوعارى ستاندارتىن كورسەتەدى.
