كانادا پالەستينا مەملەكەتىن قىركۇيەكتە مويىندايدى - پرەمەر-مينيستر
استانا. KAZINFORM - كانادا پالەستينا مەملەكەتىن قىركۇيەك ايىندا مويىنداۋدى جوسپارلاپ وتىر. بۇل تۋرالى سارسەنبى كۇنى ەلدىڭ پرەمەر-ءمينيسترى مارك كارني مالىمدەدى، دەپ جازادى شينحۋا.
ونىڭ كەڭسەسى تاراتقان حابارلامادا ايتىلعانداي، كانادا بىرىككەن ۇلتتار ۇيىمى باس اسسامبلەياسىنىڭ 80-سەسسياسىندا پالەستينا مەملەكەتىن مويىنداماق، ويتكەنى «ەكى حالىققا - ەكى مەملەكەت» جوسپارىن جۇزەگە اسىرۋ بولاشاعى قاتتى ءارى تەرەڭ تۇردە بۇزىلعان.
— بۇل نيەت پالەستينا ۇلتتىق اكىمشىلىگىنىڭ اسا قاجەت رەفورمالارعا بەيىلدىلىگىنە نەگىزدەلگەن، سونىڭ ىشىندە پالەستينا ۇلتتىق اكىمشىلىگىنىڭ پرەزيدەنتى /ماحمۋد/ ابباستىڭ باسقارۋ جۇيەسىن تۇبەگەيلى وزگەرتۋگە، 2026 -جىلى جالپى ۇلتتىق سايلاۋ وتكىزۋگە (ول سايلاۋعا حاماس قاتىسا المايدى)، جانە پالەستينا مەملەكەتىن قارۋسىزداندىرۋعا مىندەتتەمە العانى ەسكەرىلەدى، - دەلىنگەن مالىمدەمەدە.
سونداي-اق كانادا حاماس بارلىق تۇتقىندى دەرەۋ بوساتۋى جانە قارۋ-جاراقتان باس تارتۋى كەرەك ەكەنىن قايتا اتاپ ءوتتى. پرەمەر-مينيستر كەڭسەسىندە ايتىلعانداي، بۇل قوزعالىس بولاشاق پالەستينا باسقارۋىندا ەشقانداي ءرول اتقارماۋى ءتيىس.
بۇدان بۇرىن ۇلى بريتانيا پرەمەر-ءمينيسترى كير ستارمەر ەگەر يزرايل گازا سەكتورىنداعى اتىستى توقتاتۋعا جانە ۇزاقمەرزىمدى بەيبىتشىلىككە باعىتتالعان ناقتى قادامدارعا بارماسا، قىركۇيەك ايىندا پالەستينا مەملەكەتىنىڭ تاۋەلسىزدىگىن مويىندايتىنىن مالىمدەدى.
سونىمەن قوسا فرانسيا پالەستينانى مەملەكەت رەتىندە رەسمي تانۋعا شەشىم قابىلدادى. ءبىراق امەريكا قۇراما شتاتتارى فرانسيانىڭ پالەستينانى مەملەكەت رەتىندە تانۋ تۋرالى شەشىمىن قولدامادى.
