كامەلەتكە تولماعان بالانىڭ جالعىز ۇشۋى - نە ءبىلۋ كەرەك

استانا. KAZINFORM - بۇعان دەيىن 6 جاستان اسقان بالالار شەتەلگە اتا-اناسىز ۇشا الاتىنىن ايتقان ەدىك.

كامەلەتكە تولماعان جولاۋشى ەرەسەك ادامنىڭ ىلەسۋىنسىز ۇشۋ ءۇشىن نە ىستەۋ كەرەك؟ ۇشاقپەن اتا-اناسىز ساپارلايتىن بالا ءۇشىن كىم جاۋاپ بەرەدى؟ Air Astana ماماندارى ءتۇسىندىردى.

- اۋە كومپانياسىنىڭ قىزمەتىنە بالانى اتا- اناسى نەمەسە زاڭدى قامقورشىسى اۋەجايدا جونەلتۋ ءۇشىن بەرگەن ساتتەن باستاپ، كۇتىپ الۋشى اداممەن مەجەلى اۋەجايدا كەزدەسكەنگە دەيىن الىپ ءجۇرۋ كىرەدى، - دەيدى اۋە كومپانياسىنىڭ قىزمەتكەرلەرى KazInform تىلشىسىنە بەرگەن سۇحباتىندا.

بالالاردى ەرەسەكتەردىڭ ەرتۋىنسىز ۇشاققا وتىرعىزۋ ءۇشىن اۋە كومپانياسىمەن كامەلەتكە تولماعانداردى الىپ ءجۇرۋ تۋرالى كەلىسىمگە وتىرۋ كەرەك. اۆياتاسىمالداۋشىلاردىڭ رەسمي سايتىندا ۇسىنىلعان كەلىسىم ۇلگىسىن الدىن الا جۇكتەپ الىپ، ۇيدە تولتىرۋعا بولادى. سونداي-اق، بۇل قۇجاتتى ۇشۋعا تىركەلۋ كەزىندە اۋەجايداعى اۋە كومپانياسى قىزمەتكەرلەرى دە ۇسىنادى.

«ەرەسەكسىز بالا» قىزمەتىنىڭ تالاپتارى:

ۇشاق بيلەتىن ساتۋ اگەنتى ارقىلى برونداۋ كەزىندە جەتەلەۋشىسى جوق بالالاردى الىپ ءجۇرۋ قىزمەتىن سۇراڭىز؛
سۇرانىسىڭىزدىڭ راستالعانىنا كوز جەتكىزىڭىز؛
بيلەتتى رەيسكە دەيىن كەمىندە 24 ساعات بۇرىن ساتىپ الىڭىز؛
حالىقارالىق رەيستەردە 2 ساعات بۇرىن جانە ىشكى رەيستەردە 1,5 ساعات بۇرىن قۇجاتتاردى تەكسەرۋ جانە تىركەۋ ءۇشىن ەرتە كەلىڭىز (جەتەلەۋشىسى جوق بالانى قارسى الۋشى دا ەرتە كەلۋى كەرەك)؛
كامەلەتكە تولماعانداردى الىپ ءجۇرۋ تۋرالى كەلىسىمدى تىكەلەي رەيستەر ءۇشىن ءتورت دانادا جانە ترانزيتتىك رەيستەرگە التى دانادا تولتىرىپ، وزىڭىزبەن بىرگە الىپ كەلىڭىز؛
بالاڭىزدا تىركەۋ جانە وتىرعىزۋ ءۇشىن بارلىق قاجەتتى قۇجاتتاردىڭ بار ەكەنىنە كوز جەتكىزىڭىز.
ەسكەرتۋ!

ەگەر بالانى اۋەجايعا الىپ باراتىن نەمەسە كۇتىپ الاتىن ادام ونىڭ اتا-اناسى نەمەسە رەسمي قامقورشىسى بولماسا، وندا بۇل ادامعا بالامەن جول جۇرۋگە رۇقسات ەتىلگەنى تۋرالى اتا-اناسى نەمەسە قامقورشىسى نوتاريۋس ارقىلى راسىمدەلگەن سەنىمحات بەرۋى كەرەك.

Air Astana قىزمەتكەرلەرى «ەرەسەكسىز بالا» قىزمەتىن پايدالانار كەزدە ەسكەرۋ كەرەك بىرنەشە ماسەلەگە توقتالدى.

- بالانى شىعارىپ سالۋشى ەرەسەك ادام رەيس ۇشقانعا دەيىن اۋەجايدا قالۋى كەرەك. كىدىرىستەر بولعان جاعدايدا، ول جەتەلەۋشىسى جوق بالا ءۇشىن ۇشۋ ۋاقىتىنا دەيىن جاۋاپ بەرەدى. وعان قوسا، شىعارىپ سالۋشى ادام بالانىڭ ءوز قول جۇگىن ءوز بەتىنشە الىپ جۇرە الاتىنىنا كوز جەتكىزۋى كەرەك. نەمەسە ول جولجۇك رەتىندە راسىمدەلۋى قاجەت. بالانىڭ وزىمەن بىرگە الىپ كەتەتىن زاتتاردى دايىنداۋ كەزىندە جولجۇكتە جانە قول جۇكتە ءقاۋىپتى زاتتاردى تاسىمالداۋعا شەكتەۋلەر بار ەكەنىن ەسكەرۋ كەرەك. سونداي-اق، جەتەلەۋشىسى جوق بالاعا بيلەتتى «بازالىق» تاريفپەن ەمەس، باگاجدى تەگىن الىپ ءجۇرۋ نورماسىن قامتيتىن تاريفپەن ساتىپ الۋدى ۇسىنامىز، - دەيدى ماماندار.

اۋە كومپانياسىنىڭ قىزمەتكەرلەرى ەرەسەكتەردىڭ جەتەلەۋىنسىز ۇشاققا وتىرعان بالاعا قاۋىپسىزدىك ماقساتىندا ىستىق سۋسىنداردىڭ بەرىلمەيتىنىن ەسكەرتتى. ءبىراق بيلەت قۇنىنا قاتىستى ءبىرقاتار جەڭىلدىكتەر قاراستىرىلعان.

- ىشكى رەيستەردە 6- 14 جاس ارالىعىنداعى بالالار ەرەسەكتەرگە ارنالعان تولىق تاريفكە %50 جەڭىلدىك الادى. سىزگە تۋۋ تۋرالى كۋالىكتى جانە جەتەلەۋشىسى جوق بالالاردى الىپ ءجۇرۋ تۋرالى كەلىسىمدى ۇسىنۋ قاجەت. ال حالىقارالىق رەيستەردە 6- 11 جاس ارالىعىنداعى بالالار ەرەسەكتەرگە ارنالعان تولىق تاريفكە %25 جەڭىلدىك الادى. بالالارعا 12 جاستان باستاپ ەرەسەكتەرگە ارنالعان تولىق تاريف قولدانىلادى. بالانىڭ شەكارادان ءوز بەتىنشە ءوتۋى ءۇشىن سىزگە ءتولقۇجات، تۋۋ تۋرالى كۋالىك جانە اتا-انانىڭ نەمەسە قامقورشىنىڭ نوتاريالدى كۋالاندىرىلعان كەلىسىمى قاجەت، - دەيدى Air Astana قىزمەتكەرلەرى.

الايدا، بالالار كەز كەلگەن حالىقارالىق رەيستەردە جالعىز ۇشا المايدى.

- ەگەر ءسىزدىڭ بالاڭىز الماتىدان استانا ارقىلى فرانكفۋرتقا ۇشاتىن بولسا، الاڭداماڭىز - اۋە كومپانياسى وعان تولىق قامقورلىق كورسەتەدى. ياعني بالا ۇشۋ بارىسىندا جالعىز قالمايدى. استانا اۋەجايىنا كەلگەندە ونى ارنايى قىزمەتكەرلەر قارسى الىپ، باسقا رەيسكە وتىرعىزعانعا دەيىن ۇنەمى ەرتىپ جۇرەدى. بۇل قىزمەت - ەرەسەك ادامنىڭ ەرتۋىنسىز ساپار شەگەتىن بالالارعا ارنالعان. ءبىراق ترانزيت ۋاقىتى شەكتەلگەن: الماتى- استانا- لوندون باعىتى بويىنشا كۇتۋ ۋاقىتى 2,5 ساعاتتان، ال الماتى- فرانكفۋرت، فرانكفۋرت- الماتى نەمەسە لوندون- الماتى باعىتتارىندا 2 ساعاتتان اسپاۋى ءتيىس، - دەيدى ماماندار.

ايتا كەتەيىك، يران اۋە كەڭىستىگىنىڭ ۋاقىتشا جابىلۋىنا بايلانىستى بۇگىن حالىقارالىق رەيس ورىنداعان بىرنەشە ۇشاق وزبەكستان استاناسىنداعى قوسالقى اۋەجايلارعا قوندى.

اۆتور

ارۋجان ماحمۋت