كامالا حارريس امەريكانى قالاي باسقاراتىنىن ايتتى

استانا. KAZINFORM - چيكاگوداعى ا ق ش دەموكراتيالىق پارتياسى ۇلتتىق سەزىنىڭ سوڭعى كۇنىندە كامالا حارريس پرەزيدەنتتىككە كانديدات نوميناتسياسىن رەسمي قابىلداپ، ءوزىنىڭ بۇكىل ساياسي مانسابىنداعى ەڭ ماڭىزدى ءسوزدى سويلەدى، دەپ جازادى BBC.

حارريس امەريكالىقتاردى الداعى سايلاۋدى پارتيانىڭ قالاۋىنا قاراماستان «كۇيىنىشتى جەڭىپ، الداعى جولدى ايشىقتاۋدىڭ قۇندى مۇمكىندىگى» رەتىندە پايدالانۋعا شاقىردى.

«بۇگىن كەشكە ءبىزدى ءارتۇرلى ساياسي كوزقاراستاعى ادامدار باقىلاپ وتىر. مەن بارشا امەريكالىقتار ءۇشىن پرەزيدەنت بولۋعا ۋادە بەرەمىن. ءبىزدى ەڭ جوعارى ۇمتىلىستارىمىزدىڭ اينالاسىندا بىرىكتىرەتىن پرەزيدەنت بولامىن. باسقاراتىن جانە تىڭدايتىن پرەزيدەنت»، - دەدى ول.

حارريس سونىمەن قاتار رەسپۋبليكاشىل دونالد ترامپتىڭ اق ۇيگە ورالۋىنىڭ قاۋىپتى سالدارى تۋرالى ەسكەرتتى.

«ءبىز ترامپتىڭ ەكىنشى مەرزىمىنىڭ قانداي بولاتىنىن بىلەمىز. مۇنىڭ بارلىعى «جوبا 2025» قۇجاتىندا كورسەتىلگەن. كوپ جاعدايدا دونالد ترامپ ءۇستىرت ويلايتىن ۇشقالاق ادام. الايدا ونىڭ اق ۇيگە ورالۋىنىڭ سالدارى وتە اۋىر»، - دەدى ا ق ش ۆيتسە-پرەزيدەنتى.

ونىڭ ايتۋىنشا، ترامپ ەلدى كەرى تارتۋعا تىرىسادى.

«ءبىراق ءبىز وتكەنگە ورالمايمىز»، - دەدى ول بىرنەشە رەت.

«ەلىمىزدى شىن سۇيەمىن. قايدا بارسام دا، كىممەن كەزدەسسەم دە، العا جىلجۋعا دايىن، كەلەسى قادامعا جانە امەريكا دەگەن كەرەمەت ساپارعا دايىن حالىقتى كورەمىن»، - دەدى ول.

حارريستىڭ ءسوزى ءتورت كۇندىك كونگرەستىڭ شارىقتاۋ شەگى بولدى. وسى ۋاقىت ىشىندە ءىس-شارادا قازىرگى پرەزيدەنت دجو بايدەن، بيلل جانە حيللاري كلينتون، باراك پەن ميشەل وباما، وكىلدەر پالاتاسىنىڭ بۇرىنعى سپيكەرى نەنسي پەلوسي جانە حارريستىڭ پرەزيدەنتتىك باسەكەدەگى سەرىكتەسى تيم ۋولز ءسوز سويلەدى.

اۆتور
زارينا تۋعانبايەۆا