كالاچيدەگى ۇيقى اۋرۋى: قازاقستاندىق عالىمدار ونىڭ سەبەبى كومىرتەگى توتىعى دەيدى
ۇلتتىق يادرولىق ورتالىعى رادياتسيالىق قاۋىپسىزدىك جانە ەكولوگيا ينستيتۋتى فيليالىنىڭ ديرەكتورى اسان ايدارحانوۆ 2014 -جىلى كالاچي اۋىلىندا پايدا بولعان بەيمالىم ۇيقى اۋرۋىنا قاتىستى جۇرگىزىلگەن زەرتتەۋلەر قورىتىندىسى تۋرالى ايتىپ بەردى، دەپ حابارلايدى Kazinform.
- ەشقانداي رادياتسيامەن بايلانىستى ەمەس. وندا جاعداي وتە كۇردەلى. نەلىكتەن بارلىعى بىردەن رادياتسيا تۋرالى ويلادى، ويتكەنى كالاچي اۋىلى قاراۋسىز قالعان ۋران كەنىشىندە ورنالاسقان. تيىسىنشە، بۇل رادياتسيانىڭ اسەرى دەگەن كۇدىك تۋعىزدى. دەگەنمەن رادياتسيانىڭ اسەرىنەن ۇيىقتاپ كەتتى دەگەندى ءبىرىنشى رەت ەستىپ وتىرمىن. سوندىقتان ءبىز سول جەرگە ارنايى باردىق. رادون گازىنا كۇدىك بولدى. ۋران بار ايماقتاردا بۇل تابيعي قۇبىلىس، - دەدى اسان ايدارحانوۆ جۋرناليستەرگە باسپا ءسوز تۋرى بارىسىندا.
ايتۋىنشا، زەرتتەۋ ناتيجەلەرى شەتەلگە جىبەرىلگەن.
- ءبىز وندا مونيتورينگتىك زەرتتەۋلەر جۇرگىزدىك، سىنامالار الدىق، ءبىراق قانداي دا ءبىر نورمادان اسىپ كەتكەن جاعدايلاردى انىقتاعان جوقپىز. ولار ءتىپتى زەرتتەۋ دەرەكتەرىن چەحيا مەن رەسەيگە جىبەردى. ولار رادون گازىنىڭ ادامنىڭ ۇيىقتاپ كەتۋىنە ەشقانداي اسەر ەتپەيتىنىن راستادى. ءبىزدىڭ پىكىرىمىز - كومىرتەگى توتىعىنىڭ اسەرى كوبىرەك. ويتكەنى، ءبىرىنشى كەزەكتە ادام كومىرتەگى توتىعىن سەزىنىپ، ۇيىقتاي باستايدى. ءبىز مۇنداي جاعدايلارعا پەشتى پايدالانۋ جانە اۋىلدىڭ ويپاتتا ورنالاسۋى سەبەپ بولعانىن بولجاپ وتىرمىز. ول ادامنىڭ بويىنا جينالىپ، بەلگىلى ءبىر جاعدايلاردا ادامدار ۇيىقتاي باستايدى، - دەپ اتاپ ءوتتى ول.
ەسكە سالا كەتەيىك، 2014 -جىلى كالاچي اۋىلىندا ۇيقى اۋرۋى انىقتالدى. اتوم ونەركاسىبىنىڭ، گەولوگيانىڭ جانە باسقا سالالاردىڭ وكىلدەرى جۇمباق اۋرۋدىڭ سەبەبىن انىقتاۋعا اتسالىستى.
كەيىن ۇيقى اۋرۋى رادياتسيالىق فونمەن بايلانىستى ەمەس ەكەنى ايتىلدى.
اۆتور
