جۇزدەن استام رەيسكە تەگىن مىنگەن: 6 جىل بويى اۋەكومپانيالاردى الداپ كەلگەن ەر ادام ۇستالدى
ا ق ش-تىڭ 35 جاستاعى تۇرعىنى تيرون الەكساندر 2018 -جىلدان 2024 -جىلعا دەيىن ءوزىن جەتى اۋە كومپانياسىندا جۇمىس ىستەيتىن بورتسەرىك رەتىندە تانىستىرىپ، 120 دان استام رەيسكە بيلەتسىز مىنگەن. ول ىشكى جۇيەلەر ارقىلى تەگىن بيلەتتەردى برونداپ، جالعان قىزمەتكە قابىلدانعان كۇندەر مەن قىزمەتتىك بەيدج نومىرلەرىن ەنگىزىپ وتىرعان. سونىمەن قاتار، ول بورتسەرىكتەردىڭ فورماسىن كيىپ، اۋە كەمەسىنە ەركىن كىرگەن، دەپ حابارلايدى turkystan.kz ا ق ش فلوريدا سوتىنىڭ رەسمي مالىمەتىنە سىلتەمە جاساپ.
سوت قۇجاتتارى مەن تىڭدالىم كەزىندە ۇسىنىلعان دالەلدەرگە سايكەس، الەكساندر تەك ءبىر اۋە كومپانياسىندا 34 رەيسكە بيلەت الىپ، ەشقانداي اقشا تولەمەستەن ۇشقان. ول بورتسەرىك نە ۇشقىش رەتىندە تىركەلىپ، جۇمىس بەرۋشى، قىزمەتكە تۇرعان كۇنى مەن بەيدج ءنومىرى سياقتى جالعان اقپاراتتار كورسەتكەن.
تەرگەۋ بارىسىندا الەكساندردىڭ جەتى ءتۇرلى اۋە كومپانياسىندا 30 عا جۋىق جالعان بەيدج جانە قىزمەتكە ورنالاسۋ كۇندەرىن كورسەتكەنى انىقتالدى. سونداي-اق، ول تاعى ءۇش باسقا كومپانيادا دا ءوزىن بورتسەرىك رەتىندە كورسەتكەن.
ناتيجەسىندە، تيرون الەكساندردىڭ 120 دان استام رەيسكە جالعان جولمەن مىنگەنى دالەلدەنىپ، فەدەرالدى القابيلەر ونى الاياقتىق پەن اۋەجايدىڭ قورعالعان ايماعىنا جالعان سىلتاۋمەن كىرۋ بابى بويىنشا ايىپتى دەپ تانىدى. ەندى ول 30 جىلعا دەيىن باس بوستاندىعىنان ايىرىلۋى مۇمكىن.
