جۇزدەن استام قازاقستاندىق «Jibek Joly» تۋريستىك پويىزىمەن جولعا شىقتى
استانا. KAZINFORM - بۇگىن الماتىدان 100 دەن استام جولاۋشى «الماتى - تۇركىستان - تاشكەنت - سامارقان - بۇحارا - الماتى» باعىتى بويىنشا جۇرەتىن «Jibek Joly» تۋريستىك پويىزىمەن ساپارعا شىقتى. تۋردىڭ ۇزاقتىعى - 5 كۇن.
پويىز زاماناۋي ءارى جايلى وتاندىق ءوندىرىستىڭ ۆاگوندارىنان جاساقتالعان. ينتەرەر ۇلتتىق ناقىشتا بەزەندىرىلىپ، ءداستۇرلى ويۋ-ورنەكتەرمەن ايشىقتالعان. قۇرامدا ءۇش كۋپەلىك جانە ءبىر مەيرامحانا ۆاگونى بار.
«جولاۋشىلار تاسىمالى» ا ق باسپا ءسوز قىزمەتى مالىمەتىنشە، باعىت بويىندا تۋريستەر قازاقستان مەن وزبەكستاننىڭ مادەني جانە تاريحي ورتالىقتارىنا ايالداپ، عاسىرلار قويناۋىنان سىر شەرتەتىن جادىگەرلەرمەن تانىسادى. ساپار بارىسىندا ولار تۇركىستانداعى قوجا احمەت ياساۋي كەسەنەسى مەن كونە وتىرار قالاشىعىن، سامارقانداعى ءامىر تەمىر كەسەنەسى مەن ايگىلى رەگيستان الاڭىن، بۇحاراداعى ارك قامالى مەن ليابي-حاۋز الاڭىن، تاشكەنتتەگى تولە بي كەسەنەسى مەن حازرەت يمام مەموريالدىق كەشەنىن تاماشالايدى.
تۋرپاكەتكە پويىزبەن ساپار، كاسىبي گيدتەردىڭ سۇيەمەلدەۋى، بارلىق ەكسكۋرسيالىق بيلەتتەر مەن ترانسفەرلەر تولىق قامتىلعان. «Jibek Joly» تۋريستىك پويىزى «جولاۋشىلار تاسىمالى» ا ق باستاماسىمەن جانە «وزبەكستان تەمىر جولدارىنىڭ» قولداۋىمەن ۇيىمداستىرىلدى.
بۇل جوبا قازاقستاننىڭ حالىقارالىق تۋريستىك الەۋەتىن ارتتىرىپ قانا قويماي، ەكى ەل اراسىنداعى مادەني بايلانىستاردى نىعايتۋعا جانە ءوڭىردىڭ تاريحي مۇراسىن كەڭىنەن تانىتۋعا سەرپىن بەرەدى.
ايتا كەتەيىك، «سالاماتتى قازاقستان» مەديتسينالىق پويىزى پاۆلودار وبلىسىنىڭ شالعايدا ورنالاسقان 6 ەلدى مەكەنىن ارالاپ شىققان.
