جەڭىستىڭ 80 جىلدىعىنا ارنالعان اسكەري شەرۋ: قورعانىس مينيسترلىگى مالىمدەمە جاسادى

استانا. قازاقپارات - 13- ناۋرىزدان باستاپ اۋە جانە كولىك قاتىناسىنا جەكەلەگەن ۋچاسكەلەردە ۋاقىتشا شەكتەۋ ەنگىزىلۋى مۇمكىن. بۇل تۋرالى قورعانىس مينيسترلىگى حابارلايدى.

- ۇلى وتان سوعىسىنداعى جەڭىستىڭ 80 جىلدىعىنا ارنالعان استانا قالاسىندا وتەتىن اسكەري پارادقا دايىندىق شارالارىنا بايلانىستى 13-ناۋرىزدان باستاپ جەكە قۇرامدى تاسىمالداۋ جانە اسكەري تەحنيكانىڭ تەمىرجول كولىگىمەن دە، ءوز جۇرىسىمەن قوزعالىسى باستالادى دەپ جوسپارلانىپ وتىر، - دەلىنگەن حابارلامادا.

وسىعان وراي ەلىمىزدىڭ كەيبىر ايماقتارىنداعى جولداردىڭ جەكەلەگەن ۋچاسكەلەرىندە جول قوزعالىسىنا ۋاقىتشا شەكتەۋ ەنگىزىلۋى مۇمكىن.

- سونداي-اق 2025 -جىلعى 22 -ءساۋىر مەن 7 -مامىر ارالىعىندا اسكەري اۆياتسيانىڭ جاتتىعۋ ۇشۋلارىن جۇرگىزۋ ءۇشىن استانا قالاسىندا اۋە كەڭىستىگىن پايدالانۋعا قىسقا مەرزىمدى شەكتەۋلەر قويىلادى. وسىعان بايلانىستى اۋە رەيستەرىنىڭ كەستەسىنە دە وزگەرىستەر ەنگىزىلۋى مۇمكىن. ءبىز ازاماتتارعا رەيستەر تۋرالى اقپاراتتى الدىن الا ناقتىلاۋدى ۇسىنامىز، - دەيدى ۆەدومستۆودان.

سونىمەن قاتار مينيسترلىك ەنگىزىلگەن شەكتەۋلەرگە تۇسىنىستىكپەن قاراۋدى، جالعان اقپارات تاراتپاي، تەك رەسمي دەرەككوزدەرگە جۇگىنۋدى سۇراپ وتىر.

ايتا كەتەيىك، بيىل ۇلى جەڭىسكە 80 جىل تولادى.

سونداي-اق بيىل ەكىنشى دۇنيەجۇزىلىك سوعىس ارداگەرلەرىنە جەڭىستىڭ 80 جىلدىعى مەدالى بەرىلەدى.

اۆتور

داۋلەت ىزتىلەۋ