جەڭىستىڭ 80 جىلدىعى: پاراد الاڭىنا اتاقتى «كاتيۋشا» مەن ت-34 تانكى شىقتى
استانا. KAZINFORM - ەلورداداعى اسكەري پاراد كەزىندە پاراد الاڭىنا اتاقتى «كاتيۋشا» مەن ت-34 تانكى شىقتى.
تاۋەلسىزدىك جىلدارىندا قازاقستان ارمياسى قالىپتاسۋ مەن دامۋدىڭ كۇردەلى كەزەڭىنەن ءوتتى. قازىرگى تاڭدا قازاقستان قارۋلى كۇشتەرىنىڭ جاڭا كەلبەتى قالىپتاستى. كاسىبيلىگى جوعارى، ءموبيلدى ءارى زاماناۋي قارۋ- جاراقپەن جانە تەحنيكامەن جابدىقتالعان ۇلتتىق ارميا قۇرىلدى. قازاقستان قارۋلى كۇشتەرىنىڭ جوعارعى باس قولباسشىسىنىڭ بۇيرىعىنا سايكەس، اسكەر زاماناۋي قارۋ-جاراقپەن جانە تەحنيكامەن قامتاماسىز ەتىلگەن.
اتاپ ايتقاندا، بۇگىنگى پاراد كەزىندە اسكەري تەحنيكا ۇلگىلەرى، سونداي-اق ەكىنشى دۇنيەجۇزىلىك سوعىستاعى ۇلى جەڭىس جولىندا ارميانىڭ نەگىزگى قارۋى بولعان تەحنيكا ۇلگىلەرى كوپشىلىك نازارىنا ۇسىنىلدى.
الاڭنان سوعىس كەزىندە ەڭ كوپ شىعارىلعان ءارى اسا تانىمال بولعان ت-34 تانكى مەن تانىمال ب م-13 («كاتيۋشا») رەاكتيۆتى ارتيلەرريا ماشيناسى ءجۇرىپ ءوتتى. «ت-34» تانكى - ەكىنشى دۇنيەجۇزىلىك سوعىسىنىڭ اڭىزى. قاراپايىم ءارى سەنىمدى، ۇرىسقا كىرگەن العاشقى ساتتەن باستاپ ول تەڭدەسى جوق ساپاسىن كورسەتتى. سوعىس جىلدارىندا 30 مىڭنان استام «ت-34» تانكى شىعارىلدى. بۇل جاۋىنگەرلىك قاسيەتتەرى بويىنشا فاشيستىك گەرمانيانىڭ ورتاشا تانكتەرىنەن اسىپ تۇسەتىن تانك بولدى. ت-34 ۇلى وتان سوعىسىنىڭ ءبىرىنشى كۇنىنەن باستاپ سوڭعى كۇنىنە دەيىن ابىرويمەن ءوتىپ، جەڭىستىڭ سيمۆولىنا اينالدى. ال رەاكتيۆتى ارتيللەرياسىنىڭ «ب م-13» جاۋىنگەرلىك ماشيناسى «كاتيۋشا» دەپ اتالدى. ونىڭ ۇتقىرلىعى مەن ورىستەتۋ جىلدامدىعى جەدەل ارتيللەريالىق قولداۋدى قامتاماسىز ەتتى. بۇل «كاتيۋشانى» مايدان دالاسىنداعى تاپتىرماس قارۋ ەتتى.
رەاكتيۆتى جۇيە تەك تەحنيكالىق جەتىستىككە عانا ەمەس، سونىمەن قاتار ساربازداردىڭ جاۋىنگەرلىك رۋحىنىڭ سيمۆولىنا اينالدى. «كاتيۋشا» جەڭىس تاريحىندا ايتارلىقتاي ءىز قالدىردى.
ودان سوڭ سول كەزەڭدەگى ز ي س-2 زەڭبىرەكتەرى مەن م-30 گاۋبيتسالارى كورسەتىلدى. ءبىر كەزدەرى زيس-2 زەڭبىرەگى تانككە قارسى ەڭ قۋاتتى قارۋ رەتىندە تانىلدى. سوعىس كەزىندە ول «تيگر» اۋىر تانكتەرىنە قارسى قولدانىلدى.
«زيل-157» تەحنيكاسىنا ورناتىلعان 122 م م كاليبرلى «م-30» شىنجىر تاباندى ارتيللەريالىق قوندىرعى دا پاراد كەزىندە ءجۇرىپ ءوتتى. 1930 -جىلدارى جاسالعان «م-30» كەڭەس ارمياسىنىڭ جەڭىسىندە ماڭىزدى ءرول اتقاردى. سول جىلدارى «م-30» 14 شاقىرىمعا دەيىن اتىس جۇرگىزە الدى، بۇل جاۋدىڭ بەكىنىستى پوزيتسيالارىنا سوققى بەرۋگە مۇمكىندىك بەرىپ، قارسى شابۋىلدارعا مۇمكىندىكتەر اشتى.
بۇدان بۇرىن حابارلانعانداي، ەلورداداعى «قازاق ەلى» الاڭىندا مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆتىڭ قاتىسۋىمەن ۇلى جەڭىستىڭ 80 جىلدىعىنا ارنالعان اسكەري پاراد ءوتىپ جاتىر.
