جيناعان اقشاسىن قايىرىمدىلىققا جۇمساعان قارياعا باس ءمۇفتي ەرەكشە سىي جاسادى
پاۆلودار. KAZINFORM - پاۆلودار وبلىسىنىڭ باس يمامى جولداس قاجى قوسپاق ۇلى قاجىلىققا جيناعان قارجىسىن مۇقتاج بالالارعا ءبولىپ بەرگەن 93 جاستاعى ساعادات جۇمابايەۆپەن كەزدەستى. قارياعا باس ءمۇفتيدىڭ اتىنان كىشى جانە ۇلكەن قاجىلىققا جولداما بەرىلدى.
وبلىس ورتالىعىنداعى قارتتار ءۇيىن مەكەندەيتىن اقساقال ساعادات جۇمابايەۆتىڭ مۇگەدەك جەتكىنشەكتەرگە جاساعان جاقسىلىعى وزىنە قايتىپ كەلدى. وعان ەلىمىزدىڭ باس ءمۇفتيى اتىنان قاجىلىققا تەگىن بارىپ، قايتۋ مۇمكىندىگى ۇسىنىلىپ وتىر.
- ءبىز ءسىزدىڭ جاساعان ساۋاپتى ىسىڭىزگە كۋا بولدىق. قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى مەنى سىزگە ارنايى جىبەردى. وزىڭىزگە دۇعاي-دۇعاي سالەم ايتىپ، ساۋاپتى ىسىڭىزگە شىنايى العىسىن ءبىلدىرىپ جاتىر. دەنساۋلىعىڭىز جاراپ جاتسا، كەلەسى جىلى ۇلكەن قاجىلىققا اپارۋعا دايىنبىز. ونداي بولماعان جاعدايدا بيىل كىشى قاجىلىققا جىبەرەيىك. جانىڭىزعا ارنايى ادام قوسىپ بەرەمىز، بارلىق ۇيىمداستىرۋ جۇمىسىن ءوزىمىز قولعا الامىز، - دەدى وبلىستىڭ باس يمامى جولداس قاجى قوسپاق ۇلى.
بۇل جاڭالىقتى ەستىگەن قاريا ەرەكشە قۋانىپ، ريزاشىلىعىن ءبىلدىردى.
- اقساقال رەتىندە قۇرمەتتەپ، حات جولداعاندارىڭىزعا راحمەت. جالعىز بولعاننان كەيىن بارا المايمىن دەپ ءجۇردىم. ەگەر مۇنداي كومەك بولاتىن بولسا، ۇلكەن قاجىلىققا بارعىم كەلەدى، - دەگەن تاڭداۋىن ءبىلدىردى ساعادات جۇمابايەۆ.
بۇعان دەيىن 93 جاستاعى اقساقال قاجىلىققا دەپ جيناعان اقشاسىن مۇگەدەك بالالارعا ۇلەستىرىپ بەرگەنى تۋرالى جازعانبىز.
اۆتور
مۇرات اياعان
