جىلدام ۇيىقتاپ كەتۋگە كومەكتەسەتىن 5 ءادىس

استانا. KAZINFORM - كوپشىلىك ادام ءتۇن ورتاسىنا دەيىن سەريال قاراپ نەمەسە باستاعان جۇمىسىن اياقتاعىسى كەلىپ، ۇيقىنى كەيىنگە ىسىرادى. سوندىقتان كەلەسى كۇنى باسى اۋىرىپ، جۇمىسقا ىنتاسى بولمايدى. الايدا كەش جاتۋ ادەتىنەن ارىلساڭىز، دۇرىس ۇيقىنىڭ پايداسى زور. ءبىراق قالاي جىلدام ۇيىقتاپ كەتۋگە بولادى؟

كۇندەلىكتى سەگىز ساعاتتىق ساپالى ۇيقى انىق ويلاۋعا، جاس كورىنۋگە، ءجيى اۋىرماۋعا جانە ارتىق تاماقتانباۋعا كومەكتەسەدى. سونداي-اق كوڭىل كۇيىڭىز جاقسارىپ، مازاسىز ويلاردان ارىلاسىز. ەندەشە، جىلدام ۇيىقتاپ كەتۋگە كومەكتەسەتىن 5 ءادىس ۇسىنامىز.

ۇيىقتاۋعا الدىن الا دايىندالىڭىز

ادام اعزاسى جارىق شامنىڭ استىندا ۇيىقتاپ كەتە المايدى. ءتىپتى، تەلەديدار ەكرانىنىڭ جارىعىن دا مي ءالى كۇندىز دەپ قابىلداپ، ۇيقى گورمونى - مەلاتونيننىڭ ءبولىنۋىن تەجەيدى. سوندىقتان دالادا قاراڭعى تۇسە باستاعان كەزدە بەلسەندىلىكتى ازايتىڭىز. ۇيىقتاۋعا دايىندالۋ ءۇشىن بوساڭسىتاتىن ءىس تابىڭىز. مىسالى، ۆانناعا جاتىڭىز، يوگامەن اينالىسىڭىز، جالبىز قوسىلعان شاي ءىشىڭىز نەمەسە كىتاپ وقىڭىز.

كۇن ءتارتىبىن ساقتاڭىز

كۇيزەلىس گورموندارى - ادرەنالين مەن كورتيزول تابيعي سيكلدارعا سايكەس بولىنەدى. مىسالى، كورتيزول دەڭگەيى ءتۇن ورتاسىنا قاراي تۇسەدى. الايدا ەگەر ءسىز تۇنگى ساعات ۇشكە دەيىن گادجەت قاراپ وتىرساڭىز، ول قايتادان ارتىپ، مازاسىزدىق تۋدىرادى جانە ۇيىقتاۋعا كەدەرگى كەلتىرەدى. ال ەگەر كۇندە ءبىر ۋاقىتتا جاتىپ، ءبىر ۋاقىتتا وياناتىن بولساڭىز، گورموندار تابيعاتى بويىنشا ءبولىنىپ، كۇيزەلىس دەڭگەيىن ازايتۋعا ىقپال ەتەدى.

قاراڭعى جەردە ۇيىقتاڭىز

جوعارىدا ايتىلعانداي، شامداردىڭ جانە گادجەت ەكراندارىنىڭ جاساندى جارىعى اعزانى الداۋى مۇمكىن. سوندىقتان بارلىق گادجەتتى ۇيىقتاۋعا ءبىر ساعات قالعاندا تاستاڭىز جانە جاپقىشتى جاۋىپ، بولمەنى قاراڭعىلاتىڭىز.

ۇيىقتار الدىندا اقۋىز جەڭىز

ۇيىقتار الدىندا تىسكەباسار جەۋ پايدالى بولۋى مۇمكىن. الايدا بولكە ەمەس، ازداپ جاڭعاقتار جەڭىز نەمەسە ءبىر ستاقان ءسۇت ءىشىڭىز. ولار مەلاتونين مەن سەروتونيننىڭ بولىنۋىنە قاجەتتى امينقىشقىلدار - L- تريپتوفاننىڭ وڭدەلۋىنە كومەكتەسەدى.

ۇيىقتاۋعا ساعات 22:00 مەن تۇنگى 00:00 اراسىندا جاتىڭىز

وسى ۋاقىت ارالىعىندا ۇيىقتاپ كەتسەڭىز، ەرتەڭگىسىن دەمالىپ، سەرگەك بولىپ وياناسىز. باستاپقىدا ءدال وسى ۋاقىت ارالىعىندا ۇيىقتاۋ قيىنعا سوعۋى مۇمكىن. الايدا رەجيمدى قالىپتاستىرۋعا بولادى.

massaget.kz