جىل باسىنان قىتايدا جۇمىسسىزدىق دەڭگەيى 5,2 پايىزدى قۇراعان
استانا. قازاقپارات - 2025-جىلدىڭ ءبىرىنشى جارتىجىلدىعىندا قىتاي قالالارىنداعى جۇمىسسىزدىق دەڭگەيى 5,2 پايىز بولدى، دەپ جازادى شينحۋا.
2025-جىلدىڭ العاشقى التى ايىندا قىتايدىڭ ەڭبەك نارىعى جالپى العاندا تۇراقتى كۇيدە ساقتالدى. ەلدىڭ قالالارى مەن قالا تيپىندەگى ەلدى مەكەندەرىندەگى زەرتتەۋ ناتيجەلەرى بويىنشا جۇمىسسىزدىقتىڭ ورتاشا دەڭگەيى 5,2 پايىزدى قۇرادى. بۇل - جىلدىڭ ءبىرىنشى توقسانىمەن سالىستىرعاندا 0,1 پايىزدىق پۋنكتكە تومەن. بۇل تۋرالى سەيسەنبى كۇنى جاريالانعان رەسمي دەرەكتەردە ايتىلعان.
قىتاي حالىق رەسپۋبليكاسىنىڭ مەملەكەتتىك ستاتيستيكا باسقارماسىنىڭ (م س ب) مالىمەتىنە سايكەس، 2025-جىلعى ماۋسىمدا ەلدەگى قالالار مەن قالا تيپىندەگى ەلدى مەكەندەردەگى جۇمىسسىزدىق دەڭگەيى 5 پايىز بولدى.
ماۋسىم ايىنىڭ سوڭىنداعى جاعداي بويىنشا ەلدەگى اۋىلدان قالاعا قونىس اۋدارعان (ميگرانت) شارۋالار سانى وتكەن جىلدىڭ سايكەس كەزەڭىمەن سالىستىرعاندا 0,7 پايىزعا ءوسىپ، 191,39 ميلليون ادامعا جەتتى.
- قالالار مەن قالا تيپىندەگى ەلدى مەكەندەردە جۇرگىزىلگەن ساۋالنامالارعا سايكەس، بيىلعى اي سايىنعى جۇمىسسىزدىق دەڭگەيى 5 پەن 5,4 پايىز ارالىعىندا اۋىتقىپ، سالىستىرمالى تۇردە تۇراقتى كۇيدە قالدى، - دەدى مەملەكەتتىك ستاتيستيكا باسقارماسى باسشىسىنىڭ ورىنباسارى شەن لايۋن باسپا ءسوز ءماسليحاتىندا.
قىتاي 2025-جىلعا ارنالعان ماقساتتى كورسەتكىشتەرگە سايكەس، قالالار مەن قالا تيپىندەگى ەلدى مەكەندەردەگى جۇمىسسىزدىق دەڭگەيىن شامامەن 5,5 پايىز كولەمىندە ۇستاپ تۇرۋدى جوسپارلاپ وتىر. سونىمەن قاتار، بۇل ساناتتاعى ەلدى مەكەندەردە 12 ميلليوننان استام جاڭا جۇمىس ورنى قۇرىلۋى ءتيىس.
سەيسەنبى كۇنى جاريالانعان دەرەكتەرگە سايكەس، قىتايدىڭ جالپى ىشكى ءونىمى (ج ءى ءو) 2025-جىلدىڭ ءبىرىنشى جارتىجىلدىعىندا جىلدىق ەسەپپەن 5,3 پايىزعا وسكەن.
وسىعان دەيىن قىتايدا ەڭ ءىرى اينالمالى ەلەكتر جەتكىزۋ جەلىسى سالىنعانى حابارلاندى.
