جىل باسىنان قانشا ەتنيكالىق قازاق قانداس مارتەبەسىن الدى
استانا. قازاقپارات - 2025 -جىلى 2185 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 -جىلدان بەرى رەسپۋبليكاعا 1 ميلليون 150 مىڭنان استام ەتنيكالىق قازاق ورالدى.
- جىل باسىنان قازاقستانعا كەلگەن قانداستاردىڭ %46,4 - قىتايدان، %41 - وزبەكستاننان، %7,1 - تۇرىكمەنستاننان، %1,9 - رەسەيدەن،% 1,6 - مونعوليادان جانە %2 باسقا ەلدەردەن، - دەلىنگەن ەڭبەك مينىستىرلىگى حابارلاماسىندا.
وسى جىلعى 1- ناۋرىزداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى %60,8، كامەلەتكە تولماعاندار% 30,8 جانە زەينەتكەرلەر %8,4.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا %16,8 ى جوعارى ءبىلىمدى، %30,7 ى ورتا كاسىبي ءبىلىمدى،%50,8 ى جالپى ورتا ءبىلىمدى جانە %1,7 ىنىڭ ءبىلىمى جوق.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.
سونىمەن بىرگە، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، اتىراۋ، باتىس، شىعىس جانە سولتۇستىك قازاقستان وبلىستارى.
قونىستاندىرۋ وڭىرلەرىندە 2025 -جىلعا ارنالعان قانداستاردى قابىلداۋ كۆوتاسى 2309 ادام. 2025 -جىلعى 1- ناۋرىزداعى جاعداي بويىنشا قونىستاندىرۋ وڭىرلەرىنە 389 قانداس قونىس اۋداردى.
جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى — ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (275,2 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15 تەن 30 ا ە ك (59 دان 118 مىڭ تەڭگەگە دەيىن) مولشەرىندە.
جىل باسىنان بەرى 84 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 56 ادام تۇراقتى جۇمىسقا ورنالاستىرىلدى.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ %50 ى نەمەسە ءبىر وتباسىنا 4,56 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.
ايتا كەتەلىك استانادا قانداستارعا ارنالعان قايىرىمدىلىق شارا وتكەن ەدى.
