جىل باسىنان بەرى ۇلتتىق پاركتەرگە 2 ميلليونعا جۋىق تۋريست باردى
استانا. قازاقپارات - 2025 -جىلدىڭ قاڭتار- شىلدە ايلارىندا قازاقستاننىڭ ۇلتتىق پاركتەرىن 2 ميلليونعا جۋىق ادام تاماشالادى، دەپ حابارلايدى Kazakh Tourism ۇلتتىق كومپانياسى.
بۇل كورسەتكىش ەلىمىزدەگى تابيعي جانە ەكوتۋريزمگە دەگەن قىزىعۋشىلىقتىڭ ارتىپ كەلە جاتقانىن اڭعارتادى.
كەلۋشىلەر سانى بويىنشا كوشباسشى - «بۋراباي» مەملەكەتتىك ۇلتتىق تابيعي پاركى. اقمولا وبلىسىنداعى قاراعايلى ورماندارىمەن، اسەم جارتاستارى مەن كولدەرىمەن ەرەكشەلەنەتىن بۇل ايماققا 600 مىڭنان استام تۋريست كەلگەن. «قازاقستاندىق شۆەيتساريا» اتانعان بۋراباي - وتباسىلىق دەمالىس پەن بەلسەندى تۋريزمدە سۇرانىسقا يە باعىت.
ەكىنشى ورىندا - ىلە-الاتاۋ ۇلتتىق پاركى. الماتىعا جاقىن ورنالاسقان بۇل اۋماقتى 507541 تۋريست ارالاعان. تاۋلى لاندشافتتارىمەن، باي فلوراسى مەن فاۋناسىمەن تانىمال پارك ەكولوگيالىق تۋريزم بويىنشا ەڭ سۇرانىسقا يە ورىنداردىڭ ءبىرى سانالادى.
ۇزدىك ۇشتىكتى «كولساي كولدەرى» ۇلتتىق پاركى تۇيىندەيدى. الماتى وبلىسىنداعى بۇل تابيعي نىسانعا 350 مىڭنان استام ادام بارعان. كولساي مەن قايىڭدى كولدەرى - پاركتىڭ باستى تابيعي نىشاندارى.
سونداي-اق، تۋريستەر اراسىندا شارىن شاتقالى ورنالاسقان ۇلتتىق پارك پەن باياناۋىل ۇلتتىق پاركى دە كەڭ تانىمال. شارىن فوتوتۋريزم مەن ەتنوەكسپەديتسيالارعا قىزىعۋشىلار ءۇشىن تارتىمدى بولسا، پاۆلودار وبلىسىنداعى باياناۋىل قازاقستانداعى العاشقى ۇلتتىق پارك رەتىندە جۇمساق كليماتى، تاۋلى تابيعاتى جانە اسەم كولدەرىمەن ەرەكشەلەنەدى.
ايتا كەتەيىك، جەتىسۋ وبلىسىندا تۋريزمدى دامىتۋ باسقارماسى قۇرىلادى.
