جىل باسىنان بەرى 4,7 ميلليون ادامعا الەۋمەتتىك تولەم بەرىلدى - ەڭبەك ءمينيسترى

استانا. KAZINFORM - مەملەكەتتىڭ بارلىق الەۋمەتتىك مىندەتتەمەلەرى ۋاقتىلى جانە تولىق كولەمدە ورىندالىپ كەلەدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ۇكىمەت وتىرىسىندا باياندادى.

ءمينيستردىڭ ايتۋىنشا، جىل باسىنان بەرى بارلىق تولەمدەر يندەكستەلگەن. بازالىق زەينەتاقىنى كەزەڭ-كەزەڭمەن ارتتىرۋ جالعاستىرىلدى.

- الەۋمەتتىك تولەمدەرمەن 4,7 ميلليون ادام قامتىلدى. ەڭبەك مينيسترلىگىنىڭ بيۋجەتى 6,1 تريلليون تەڭگەنى قۇرادى، شامامەن 3 تريلليون تەڭگەسى يگەرىلدى، - دەدى ەڭبەك ءمينيسترى.

مۇگەدەكتىگى بار ادامداردى الەۋمەتتىك قولداۋ شەڭبەرىندە 285,7 ميلليارد تەڭگەگە جاردەماقىلار مەن تولەمدەر تولەنگەن.

- پورتال ارقىلى 300 مىڭعا جۋىق وڭالتۋ قۇرالدارى مەن قىزمەتتەرى كورسەتىلدى، 18,6 مىڭ ادام ينۆاتاكسيدى قولداندى. بيىلدان باستاپ ارناۋلى الەۋمەتتىك قىزمەت كورسەتۋدى ليتسەنزيالاۋ ەنگىزىلدى. بۇگىنگى كۇنى 568 ورتالىق ليتسەنزيا الدى، - دەدى س. جاقىپوۆا.

سونىمەن بىرگە، ءبىرىڭعاي سيفرلىق پلاتفورما بەلسەندى تۇردە ەنگىزىلىپ جاتىر. شىلدەنىڭ سوڭىنا دەيىن پلاتفورماعا بارلىق وڭىرلەردى قوسۋ مىندەتى تۇر.

- بۇل مەملەكەت باسشىسىنىڭ تاپسىرماسىنا سايكەس، كومەكتىڭ اتاۋلىلىعىن جانە شىن كومەككە ءزارۋ ازاماتتارعا قولداۋ كورسەتۋگە مۇمكىندىك بەرەدى، - دەدى س. جاقىپوۆا.

ايتا كەتەيىك، 2026-جىلدان زەينەتاقى مەن جاردەماقى وسەدى، بۇعان 662 ميلليارد تەڭگە بولىنەدى.