جىل باسىنان باستاپ 45 ادام سۋعا باتىپ كەتتى - قۇتقارۋشىلار ماۋسىمعا دايىن با

استانا. KAZINFORM - توتەنشە جاعدايلار ءمينيسترى شىڭعىس ءارىنوۆ شومىلۋ ماۋسىمىنداعى قاۋىپسىزدىك شارالارى تۋرالى تۋرالى ايتىپ بەردى.

утонули
Фото: freepik.com

«جىل سايىن جۇزدەگەن ادام سۋعا كەتىپ قازا تابادى. قايعىلى جاعدايدىڭ باسىم بولىگى جاز مەزگىلىندە بولادى. جىل باسىنان باستاپ 45 ادام، ال 1-ماۋسىمنان بەرى 27 ادام سۋعا باتىپ كەتتى»، - دەدى ت ج ءمينيسترى ۇكىمەت وتىرىسىندا.

سونداي-اق، مينيسترلىكتىڭ حالىقتى قورعاۋ شارالارى ناتيجە كورسەتىپ، 2020 -جىلدان بەرى سۋداعى ادام ءولىمىنىڭ سانى 437-دەن 227-گە دەيىن ازايدى.

«قازىر سۋ ايدىندارىندا مينيسترلىكتىڭ 42 قۇتقارۋ بەكەتى حالىقتىڭ قاۋىپسىزدىگىن قامتاماسىز ەتەدى. كەلەسى جىلى شالقار، يمانتاۋ كولدەرىنىڭ بويىندا جانە قوسشى قالاسىندا 3 مودۋلدىك ستانتسيانىڭ قۇرىلىسى اياقتالادى. ءبىراق ءىرى سۋ قويمالارىنا 15 ستانسيا جەتكىلىكسىز»، - دەيدى ش. ءارىنوۆ.

وعان قوسىمشا جازعى كەزەڭدە قايىقتارمەن جانە قۇتقارۋ قۇرالدارىمەن جابدىقتالعان موبيلدى پوستتار قويىلادى.

ولار سۋ ايدىندارىنا كەزەكشىلىك پەن پاترۋلدەۋ جۇرگىزىلەدى.

اتاپ ايتقاندا، مينيسترلىكتىڭ قۇتقارۋشىلارى جىل باسىنان بەرى - 76 ادامدى، شومىلۋ ماۋسىمى باستالعالى - 24 ادامدى قۇتقارىپ قالعان.

«قۇتقارۋ بولىمشەلەرىن جابدىقتاۋعا قاتىستى پروبلەمالار بار، قولدا بار قايىقتاردىڭ كوبى جارامسىز كۇيدە. قازىر زاماناۋي كاتەرلەر، ءجۇزۋ قۇرالدارىن جانە درونداردى جوسپارلى تۇردە ساتىپ الۋدامىز. ماڭعىستاۋ وبلىسىندا كاسپي تەڭىزىنىڭ جاعالاۋىندا ۇلتتىق تەڭىز جاساعىن قۇرۋ جۇمىسى ءجۇرىپ جاتىر»، - دەدى سپيكەر.

سۋداعى ءولىم-ءجىتىمنىڭ %95 شومىلۋعا تىيىم سالىنعان ورىنداردا تىركەلەدى. الايدا رۇقسات ەتىلگەن ورىنداردا دا ادام ءولىمى بولادى. توتەنشە جاعدايلار ءمينيسترى شىڭعىس ءارىنوۆ تەكسەرۋ جۇمىستارىن كۇشەيتۋدى ۇسىنىپ وتىر.

«سۋعا باتىپ كەتكەندەردىڭ %95 شومىلۋعا تىيىم سالىنعان ورىنداردا تىركەلەدى. وسىلايشا اكىمدىكتەرمەن بىرلەسىپ، سۋعا شومىلۋ مەن دەمالۋعا رۇقسات ەتىلگەن ورىنداردى جىلدان-جىلعا ۇلعايتىپ جاتىرمىز. ونىڭ سانى بۇگىن 708-گە جەتتى جانە ءبارى 2GIS پلاتفورماسىندا ورنالاسقان»، - دەدى ش. ءارىنوۆ ۇكىمەت وتىرىسىندا.

ماۋسىم ايىنىڭ سوڭىنا دەيىن قوسىمشا تاعى 33 جاعاجاي اشىلادى. دەگەنمەن، ولاردىڭ سانى ءالى دە جەتكىلىكسىز.

«كەيبىر جاعاجايلار بەلگىلەنگەن تالاپتار مەن سانيتارلىق نورمالارعا سايكەس كەلمەيدى، سونىڭ سالدارىنان جازاتايىم وقيعالار بولادى. مىسالى وتكەن جىلى رۇقسات ەتىلگەن دەمالىس ورىندارىندا 5 ادام سۋعا باتىپ كەتتى. تاعى ءبىر توقتالاتىن جايت، دەمالۋشىلار بەلسەندى تۇردە گيدروتسيكلدەردى پايدالانادى، ال ولاردى دۇرىس پايدالانباۋ قازا بولۋ قاۋپىنە اكەلۋى مۇمكىن»، - دەدى ت ج ءمينيسترى.

ىشىمدىك ءىشىپ، ماس كۇيدە سۋعا شومىلۋ ادام ولىمىنە اكەلەتىنىن ەسكەرىپ، مينيسترلىك پوليتسيامەن بىرلەسىپ رۇقسات ەتىلگەن جانە تىيىم سالىنعان ورىنداردا پاترۋلدەۋ مەن رەيدتەر وتكىزەدى.

جىل باسىنان بەرى 26 مىڭنان اسا وسىنداي شارا جۇرگىزىلىپ، قۇقىق بۇزعان 3 مىڭعا جۋىق ادام، بيىلعى 1 -ماۋسىمنان باستاپ - 49 ادام اكىمشىلىك جاۋاپقا تارتىلدى.

كاسىپكەرلىك كودەكسىنە سايكەس، مينيسترلىك جاعاجايلارعا ادام ءولىمى فاكتىلەرى تىركەلگەن جاعدايدا عانا تەكسەرۋ جۇرگىزە الادى.

وسىعان بايلانىستى اكىمدىكتەر رۇقسات بەرگەن كەزدە دەمالىس ورىندارىنىڭ ينفراقۇرىلىمىن باقىلاۋدى كۇشەيتۋ قاجەت.

سونداي-اق، كولىك مينيسترلىگى شاعىن كولەمدى كەمەلەردى تەكسەرۋى كەرەك.

«وتكەن جىلدان باستاپ الماتى جانە پاۆلودار قالالارىنىڭ اكىمدىكتەرى پيلوتتىق رەجيمدە سۋعا باتقانداردى ەرتە انىقتاۋ جۇيەسىن ىسكە قوستى. بەينەباقىلاۋ مەن مونيتورينگ جاساۋدىڭ وسىنداي جۇيەلەرىن بارلىق وڭىرلەرگە، اسىرەسە تىيىم سالىنعان جەرلەرگە ورناتۋ قاجەت. بۇل ادام ءولىمىن ازايتۋعا مۇمكىندىك بەرەدى»، - دەدى ش. ءارىنوۆ.

اۆتور

ايجان سەرىكجان قىزى

سوڭعى جاڭالىقتار