جۇيكەم تىنىش بولسىن دەسەڭىز

استانا. قازاقپارات - ادامنىڭ جۇيكە جۇيەسىنىڭ توزۋى ونىڭ بۇكىل اعزاسىنا تەرىس اسەرىن تيگىزەدى. كۇيزەلىستەر، شەكتەن تىس شامدانۋ تۇتاس اعزانىڭ السىرەۋىنە اكەلەدى. سونىڭ سالدارىنان ءتۇرلى اۋرۋلار تۋىندايدى. قازىرگى تاڭدا دارىگەرلەر جۇيكە جۇيەسىن نىعايتاتىن بەس نەگىزگى تاعامدار توبىن ايقىندادى.

ءبىرىنشى توپقا B1 دارۋمەنى كىرەدى، ول قاراقۇمىق جارماسىندا، سۇلى بوتقاسىندا، جانە قارا ناندا كوپ.

ەكىنشى توپتاعى B2 دارۋمەنى جۇيكە جۇيەسى ءۇشىن اقىل-وي ەڭبەگىنەن كوپ كۇش تۇسكەندە تاپتىرماس ەم ەكەن. وعان بۇرشاق تۇقىمداستارى، ساۋمالدىق، سىرا اشىتقىسى، ورىكتەر، جۇمىرتقا ونىمدەرى جاتادى. بۇل ونىمدەردى پايدالانبايتىن ادامنىڭ كوڭىل-كۇيى تومەندەپ، باسى اۋىرىپ، ءوزىن ءالسىز سەزىنىپ جۇرەتىن كورىنەدى.

ال مىنا قىم-قۋىت زاماندا كۇيزەلىستەن ارىلۋ ءۇشىن جانە ەموسيالىق تۇرعىدان جەڭىلدىكتى سەزىنۋ ءۇشىن B12 دارۋمەنىن پايدالانعان ءجون، دەيدى دارىگەرلەر. ول تەڭىز ونىمدەرىنىڭ، جۇرەك، باۋىر، بۇيرەك سياقتى مال ونىمدەرىنىڭ جانە جۇمىرتقانىڭ اقۋىزىندا مول. بۇل ونىمدەردى تۇتىنۋ ميدىڭ ينتەللەكتۋالدىق جۇمىسىن قالپىنا كەلتىرىپ، ادامنىڭ ەستە ساقتاۋ قابىلەتىن جاقسارتادى ەكەن. سونداي-اق ولاردىڭ كوڭىل-كۇيگە دە وڭ اسەرى بار. اتالمىش تاعامداردى تۇتىنباساڭىز، سىزدىڭ السگەيمەر اۋرۋىنا شالدىعۋىڭىز قاۋپى ارتادى ەكەن.

ءسۇت جانە بارلىق ءسۇت ونىمدەرى كالسيدىڭ كوزى بولىپ تابىلادى. ال اعزادا بۇل مينەرال جەتىسپەگەن جاعدايدا ادام مازاسىزدانىپ، اشۋشاڭدىققا بوي الدىرادى.

جۇيكەنىڭ قالىپتى قىزمەتىن قامتاماسىز ەتۋ ءۇشىن قاجەتتى پايدالى تاعامداردىڭ سوڭعى توبىن قۇرامىندا يودى بار اس ونىمدەرى قۇرايدى. وعان بارلىق تەڭىز ونىمدەرى، اتاپ ايتقاندا، تەڭىز قىرىققاباتى مەن تەڭىز بالىقتارى جاتادى.