جولاۋشىلار پويىزدارى 412 ساعاتقا كەشىككەن - اۋديت
استانا. KAZINFORM - ماجىلىستە جوعارى اۋديتورلىق پالاتا ءتوراعاسى ءاليحان سمايىلوۆ كولىك سالاسىن دامىتۋعا بولىنگەن بيۋدجەت قاراجاتىنا جاسالعان اۋديت ناتيجەسىن بايانداۋدا.

سپيكەردىڭ ايتۋىنشا، ونداعان جىلدار بويى جينالعان ماسەلەلەردى شەشۋدىڭ ورنىنا كوبىنە جىرتىقتى جاماۋ جۇمىستارى جۇرگەن.
«23 وبەكتىدە 3 تريلليون تەڭگەنى قامتيتىن اۋديت جۇرگىزىلدى. ناتيجەسىندە 29 ميلليارد تەڭگەگە قارجىلىق بۇزۋشىلىقتار، 168 ميلليارد تەڭگەگە بيۋدجەت قاراجاتىنىڭ ءتيىمسىز جوسپارلانعانى جانە ءتيىمسىز پايدالانىلعانى انىقتالدى. ەكونوميكالىق شىعىندار مەن جىبەرىپ العان پايدا 307 ميلليارد تەڭگەنى قۇرادى. اۋديت قورىتىندىسى بويىنشا 5 ماتەريال قۇقىق قورعاۋ ورگاندارىنا جولداندى. 117 ماتەريال اكىمشىلىك جاۋاپقا تارتۋ ءۇشىن جىبەرىلدى»، - دەدى ءا. سمايىلوۆ.
سوڭعى ءتورت جىلدا تەمىرجول سالاسىن دامىتۋعا شامامەن 2 تريلليون تەڭگە، سونىڭ ىشىندە بيۋدجەت قاراجاتى ەسەبىنەن 332 ميلليارد تەڭگە جۇمسالعان. قوماقتى قاراجات بولىنگەنىنە قاراماستان، بۇل ەكونوميكانىڭ جۇكتەر مەن جولاۋشىلاردى تاسىمالداۋ قاجەتتىلىگىن ۇزدىكسىز جانە ساپالى قامتاماسىز ەتۋ ءۇشىن جەتكىلىكسىز بولىپ شىقتى.
«سالدارىنان تەمىرجول جەلىلەرى، لوكوموتيۆتەر، ۆاگوندار ابدەن توزعان. تەك 2023 -جىلدىڭ وزىندە جولاۋشىلار پويىزدارىنىڭ كەشىگۋى 412 ساعاتتى قۇرادى نەمەسە 2022 -جىلمەن سالىستىرعاندا 5 ەسە وسكەن. كەزىندە ءوزىن- ءوزى قامتاماسىز ەتكەن كومپانيا ءتيىمسىز جانە كونسەرۆاتيۆتى باسقارۋ، مەملەكەت يەلىگىنەن دۇرىس ويلاستىرىلماي شىعارۋ سالدارىنان بۇگىندە ارەڭ كۇن كورۋدە»، - دەدى اۋديتورلىق پالاتا ءتوراعاسى.
اۆتور
ايجان سەرىكجان قىزى