جول ەرەجەسىن ءجيى بۇزاتىن قالتالى جاستارعا شارا قولدانۋ كەرەك - سەناتور
استانا. KAZINFORM - سەناتور مارات قوجايەۆ ءوزىنىڭ دەپۋتاتتىق ساۋالىندا نەلىكتەن جول ەرەجەسىن ءجيى بۇزاتىندارعا ايىپپۇل كولەمىن ارتتىرۋ ۇسىنىسىن ايتقانىن ءتۇسىندىردى.
- قاڭتار ايىندا وڭىرلەردى ارالاپ كەلدىك. سول كەزدە جول ەرەجەسىن ورەسكەل بۇزاتىنداردىڭ دەرەكتەرىمەن تانىستىق. ماسەلەن، الماتىدا ونداعان جاس جىگىت قىمبات كولىكتەردى تىزگىندەپ، ايىپپۇل تولەۋدى سونشالىقتى اۋىرتپالىق ساناماي جۇرگەنىن بىلدىك. ولار كۇن سايىن جول ەرەجەسىن بۇزادى، قاتتى جىلدامدىقپەن جۇرەدى. بۇل دەرەكتەردى كامەرالار انىقتاپ جاتىر، ءبىراق ولارعا ايىپپۇلدان باسقا جازا قولدانىلمايدى. ال ايىپپۇلدى ءبىر اپتانىڭ ىشىندە وتەسە، ونى جەڭىلدىكپەن تەك 50 پايىز عانا تولەيدى. اتاپ ايتقاندا، قاراپايىم حالىققا 14 مىڭ تەڭگە ايىپپۇل كادىمگىدەي اۋىرپالىق تۇسىرسە، ال جاڭاعى قالتالى جاستار ونى كۇندەلىكتى شامالى شىعىنى دەپ كورەدى، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
وسى ورايدا ول جول ەرەجەسىن ءجيى بۇزاتىندارعا باسقا دا جازالاۋ شارالارىن قولدانۋ كەرەك ەكەنىن ايتتى.
- بۇل ادامداردى تارتىپكە تارتۋ كەرەك قوي؟! كولىك قۇرالىنىڭ ءبىر جۇرگىزۋشىسى ءبىر جىلدا 143 رەت ەرەجە بۇزعان (الماتىدا) جانە ايىپپۇلدى 50 پايىز جەڭىلدىكپەن وتەگەن. بۇل ادامدارعا ايىپپۇل تولەۋ سونشالىقتى شىعىن ەمەس. سول سەبەپتى ءتيىستى ۇسىنىستى جاريالادىم، - دەدى دەپۋتات.
ەسكە سالساق، جاقىندا سەناتور مارات قوجايەۆ ءوزىنىڭ دەپۋتاتتىق ساۋالىندا ايىپپۇل ارقىلى ەرەجەنى قايتا بۇزۋمەن كۇرەس مۇمكىن ەمەستىگىن ايتا كەلىپ، سوڭعى كەزدە جول ەرەجەسىن بۇزۋ دەرەكتەرى كوبەيە تۇسكەنىن اتاپ ءوتتى.
وسى ورايدا ول ۇكىمەت باسشىسىنىڭ اتىنا ساۋال جولداپ، ءوزىنىڭ ۇسىنىستارىن ايتتى.
دەپۋتاتتىڭ پايىمىنشا، جول ەرەجەسىن ءجيى بۇزاتىندارعا ايىپپۇل تولەۋدە %50 جەڭىلدىكتى الىپ تاستاۋ كەرەك.
