جوعارى وقۋ ورىندارىن قارجىلاندىرۋدىڭ جاڭا مودەلى ازىرلەنىپ جاتىر
استانا. KAZINFORM - بيىل جوعارى وقۋ ورىندارىنىڭ سيفرلىق ۇلتتىق رەيتينگى ەنگىزىلەدى. بۇل تۋرالى سەناتتا ءوتىپ جاتقان پارلامەنتتىك تىڭداۋدا عىلىم جانە جوعارى ءبىلىم ءمينيسترى ساياسات نۇربەك ايتتى.
- Maqsut Narikbayev University جانىنداعى «قۇقىق» باعىتى بويىنشا وقۋ-ادىستەمەلىك بىرلەستىگىمەن بىرگە زاڭ ءبىلىمىن دامىتۋدىڭ ارنايى ۇلكەن تۇجىرىمداماسى ازىرلەندى. 7 ۇلكەن باعىتى بار قۇجات دايىندالدى. كوميتەتتىڭ (سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى) بىلتىرعى ۇسىنىستارى وسى تۇجىرىمدامادا ەسكەرىلگەن، ناقتى شارالار كوزدەلگەن. مينيسترلىك 2024 -جىلى مۇددەلى مەملەكەتتىك ورگاندارمەن كەلىسىلگەن زاڭ ءبىلىمىن دامىتۋ جونىندەگى جول كارتاسىن بەكىتتى، - دەدى ساياسات نۇربەك.
ونىڭ اتاپ وتۋىنشە، مينيسترلىك بۇگىندە جوعارى ءبىلىمنىڭ ساپاسىن ارتتىرۋ، جوعارى وقۋ ورىندارىنىڭ ساپالى ءبىلىم بەرۋدەگى جاۋاپكەرشىلىگىن ارتتىرۋ جانە جوعارى ساپانى قامتاماسىز ەتەتىن ۋنيۆەرسيتەتتەردى قولداۋ ماقساتىندا قارجىلاندىرۋدىڭ جاڭا مودەلىن ازىرلەپ جاتىر.
ساپانى قامتاماسىز ەتۋدىڭ ءتيىمدى تەتىكتەرىنىڭ ءبىرى رەتىندە - جوعارى وقۋ ورىندارىنىڭ سيفرلىق ۇلتتىق رەيتينگى ازىرلەنەدى. ەلىمىزدەگى بارلىق 121 جوعارى وقۋ ورنى اتالعان رەيتينگكە كىرەدى.
رەيتينگ ءادىسناماسى حالىقارالىق اكادەميالىق رەيتينگتەردىڭ نەگىزىندە جاسالدى.
- وسى رەيتينگتىڭ ارقاسىندا مەملەكەتتىك تاپسىرىستىڭ دا فورماتى وزگەرەدى. بىردەن باستامايمىز. رەيتينگ بيىل ەنگىزىلەدى، - دەدى مينيستر.
ايتا كەتەيىك، سەناتتا ءوتىپ جاتقان سوت جانە قۇقىق قورعاۋ جۇيەلەرىنىڭ، سونداي-اق نورماشىعارماشىلىق قىزمەتتىڭ ساپاسىن ارتتىرۋ ماقساتىندا مەملەكەتتىك ورگانداردىڭ زاڭ قىزمەتتەرىنىڭ كادرلىق الەۋەتىن نىعايتۋ اياسىندا زاڭ ءبىلىمىن دامىتۋ ماسەلەلەرى بويىنشا پارلامەنتتىك تىڭداۋ بارىسىندا پالاتا ءتوراعاسى ماۋلەن اشىمبايەۆ زاڭ سالاسىنداعى مامانداردىڭ سانى بار دا ساپاسى جوق ەكەنىن ايتقان بولاتىن.
ال بۇگىندە ولاردىڭ 97 پايىزى اقىلى نەگىزدە ءبىلىم الىپ جاتىر.
