جوعالعان تىكۇشاق: ىزدەستىرۋ جۇمىستارى قاشان اياقتالادى
استانا. KAZINFORM - جوسپارلى ۇشىپ ءوتۋ كەزىندە جوعالعان EC-145 تىكۇشاعىن انىقتاۋ ماقساتىندا سوربۇلاق سۋ قويماسى اۋدانىندا ىزدەستىرۋ جۇمىستارى جالعاسىپ جاتىر. بۇل تۋرالى ق ر توتەنشە جاعدايلار ۆيتسە-ءمينيسترى كەگەن تۇرسىنبايەۆ ءمالىم ەتتى.
- قارۋلى كۇشتەردىڭ تىكۇشاعى جوعالعانى تۋرالى اقپارات تۇسكەن ساتتەن باستاپ الماتى قالاسىنان ءبىزدىڭ (ت ج م-ءنىڭ) ەكى تىكۇشاق ىزدەستىرۋ جۇمىستارىنا جۇمىلدىرىلدى… سونىمەن قاتار سول جەردەگى اۋماقتى شولىپ شىقتىق جانە تىكۇشاققا تيەسىلى بولۋى مۇمكىن بولشەكتەر تابىلدى. قازىر سوربۇلاقتا ىزدەستىرۋ جالعاسىپ جاتىر. بىرىنشىدەن، وسى جۇمىستاردى نەگىزىنەن قورعانىس مينيسترلىگى اتقارىپ وتىر، سونداي-اق ءبىزدىڭ قۇرىلىمدار دا سول جەرگە تارتىلدى. 1-2 كۇن ىشىندە ونى تابادى دەپ سەنەمىز، - دەدى ك. تۇرسىنبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ەسكە سالساق، 25 -شىلدەدە الماتى وبلىسىندا جوسپارلى ۇشۋ بارىسىندا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ EC-145 تىكۇشاعى راداردان جوعالىپ كەتتى.
26 - شىلدەدە ت ج م قۇتقارۋشىلارى جوعالعان تىكۇشاقتىڭ بولشەكتەرىن تاپتى.
جوسپارلى ۇشىپ ءوتۋ كەزىندە جوعالعان اۋە قورعانىسى كۇشتەرىنىڭ EC-145 تىكۇشاعىندا بولعان ادامداردىڭ ورنىن انىقتاۋ ماقساتىندا سوربۇلاق سۋ قويماسى اۋدانىندا اۋقىمدى ىزدەستىرۋ-قۇتقارۋ وپەراتسياسى تاۋلىك بويى جانە كۇشەيتىلگەن رەجيمدە جۇرگىزىلىپ جاتىر.
اۆتور
رۋسلان عابباسوۆ
