جەتىسۋلىق ەگىز ءاليا مەن مانشۇك: باتىر قىزدار جولىمەن اسكەري ماماندىقتى تاڭدادىق
اقتوبە. KAZINFORM - بۇگىن قازاقتىڭ باتىر قىزى، مەرگەن، كەڭەس وداعىنىڭ باتىرى ءاليا مولداعۇلوۆانىڭ تۋعان كۇنى. قازاق قاھارمانىنىڭ تۋعانىنا - 99 جىل. ال وسىدان ەكى كۇن بۇرىن 23-قازاندا قازاقتىڭ تاعى ءبىر قاھارمان قىزى، پۋلەمەتشى، كەڭەس وداعىنىڭ باتىرى مانشۇك مامەتوۆانىڭ تۋعان كۇنى ءوتتى. ايتۋلى داتا قارساڭىندا اگەنتتىك ءتىلشىسى ەگىز ءاليا مەن مانشۇك مۇرات قىزىمەن اڭگىلەسكەن ەدى.
بۇگىنگى ءاليا مەن مانشۇك جەتىسۋ وبلىسى الاكول اۋدانى ءۇشارال قالاسىنىڭ تۋماسى. قازىر ەگىز قىز كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتىنىڭ 1-كۋرس كۋرسانتتارى. ولار اسكەري مەديتسينا ماماندىعىن مەڭگەرىپ جاتىر.
«ءبىز بۇل ماماندىققا ءوز تاڭداۋىمىزبەن، قالاۋىمىزبەن تۇستىك. جالپى اسكەري ماماندىققا بالا كۇنىمىزدەن قىزىقتىق، وعان سەبەپ اتامىز ەكىنشى دۇنيەجۇزىلىك سوعىس ارداگەرى، ال اكەمىز اسكەري ادام. ءبىراز، جوعارى وقۋ ورىندارىن قاراپ، ويلانا كەلە، باتىر قىزدار جولىمەن اسكەري مەديتسينا ماماندىعىن تاڭدادىق. اسكەري قىزمەتشىلەر وقۋ-جاتتىعۋ جانە باسقا اسكەري مىندەتتەردى ورىندايدى، ولاردىڭ ماقساتى - قاشاندا ەلدى قورعاۋعا دايىن بولۋ. وسىلايشا ەلىمىزدىڭ باتىر قىزدارىنىڭ جولىن بەرسىن دەپ وسى سالانى مەڭگەرۋدى ۇيعاردىق»، - دەدى ءاليا مۇرات قىزى اگەنتتىك تىلشىسىمەن اڭگىمە بارىسىندا.
ءاليا مەن مانشۇكتىڭ اسكەري مەديتسينانى تاڭداۋىن اتا-اناسى قولداپ، جەتىسۋ وڭىرىنەن اقتوبەگە وقۋعا جىبەرگەن.
سونداي-اق، جەتىسۋلىق ەگىز ەسىمدەرىن كىم قويعانىن جانە نە ءۇشىن قويعانىن ايتىپ بەردى.
«ءبىزدىڭ ەسىمدى انامنىڭ ءسىڭلىسى ءارى كىندىك انامىز قويدى. ارينە، الدىمەن ىرىمداپ ءاليا مەن مانشىكتەي ەلىم دەيتىن ەرجۇرەك باتىر قىزدار بولسىن دەگەن نيەتپەن قويعان. ەكىنشى قىزىقتى جاعداي، ءبىز ەگىز بولساق تا ءبىر-بىرىمىزگە ۇقسامايمىز، سوندىقتان قازاقتىڭ قوس باتىر قىزىنىڭ ەسىمىن تاڭداعان»، - دەيدى مانشۇك مۇرات قىزى.
ايتا كەتسەك، 2025 -جىلى قازاقتىڭ باتىر قىزى ءاليا مولداعۇلوۆانىڭ تۋعانىنا 100 جىل تولادى.
بۇعان دەيىن قازاقستاندىق كينوگەرلەر قازاقتىڭ قاھارمان قىزى ءاليا مولداعۇلوۆا تۋرالى «ءاليا» اتتى جاڭا كوركەم فيلمدى تۇسىرۋگە دايىندالىپ جاتقانىن حابارلاعان ەدىك.
ءا. مولداعۇلوۆانىڭ 100 جىلدىعىنا جانە جەڭىستىڭ 80 جىلدىعىنا ارنالعان ء«اليا» تولىقمەتراجدى كوركەم فيلمى 2025 -جىلدىڭ مامىر ايىندا جارىققا شىعادى.
اۆتور
داۋلەت ىزتىلەۋ
