جەتىسۋلىق شارۋالار جۇگەرى باعاسىنا الاڭدايدى

жүгері
Фото: Фото: Pixabay

جەتىسۋ وبلىسىنداعى پانفيلوۆ اۋدانىنىڭ تاريحى جۇگەرى ءوسىرۋشى ديقانداردىڭ داڭقىمەن تىعىز بايلانىستى.

«دالا ارۋى» اتانعان داقىل ەگىستىگىنە قازىر دە باسىمدىق بەرىلگەن. بيىل اۋداندا 26750 گەكتار القاپقا جۇگەرى ەگىلدى. ونىمدىلىك جوعارى. الايدا شارۋالاردى جۇگەرىنىڭ باعاسى الاڭداتىپ وتىر، دەپ حابارلايدى Kazinform ءتىلشىسى.

بىرەر اپتا بۇرىنعى دەرەك بويىنشا، وبلىستا داندىك جۇگەرىنىڭ 12,2 مىڭ گەكتارى جينالىپ، ودان 74,8 مىڭ توننا ءونىم الىنعان.

ءار گەكتارعا شاققانداعى ورتاشا ونىمدىلىك 61,3 تسەنتنەردەن اينالىپ وتىر. ال پانفيلوۆ اۋدانىنداعى جۇگەرىنىڭ جيىن-تەرىن ۇلەسى 30 پايىزدان اسقان.

تەك تاۋلى وڭىردەگى القاپتارعا وراق كەشتەۋ تۇسەدى. ءبىراق جەرگىلىكتى شارۋالاردى ءونىمنىڭ كولەمى ەمەس، ورىلعان داقىلدى وتكىزۋ قۇنىنىڭ تومەندەپ كەتۋى ابىگەرگە سالۋى مۇمكىن.

ويتكەنى قازىر جۇگەرىنىڭ ءار كەلىسىنە قويىلعان ساتىپ الۋ باعاسى 70-75 تەڭگە ارالىعىندا قۇبىلىپ تۇر. بۇل - وتە تومەن باعا.

بىلتىر وتكىزۋ قۇنى 126 تەڭگە بولعان. ساتىپ الۋ باعاسىنىڭ مۇنشالىق قۇلدىراۋىنا رەسەيدەن شەكتەۋسىز كەلىپ جاتقان دايىن جۇگەرى ءدانى مەن جۇگەرى ءونىمى كولەمىنىڭ ارتۋى اسەر ەتىپ وتىر ەكەن.

- اۋدان ديقاندارى جۇگەرى وسىرۋگە بەيىمدەلگەن. اتا كاسىبىمىز دەسەك تە بولادى. جۇگەرى جاقسى شىعىپ، ءونىمدى دىتتەگەن باعاعا وتكىزسە، شارۋانىڭ مۇرتى مايلانادى. شىعىنىن وتەپ، كەلەر جىلدىڭ قامىنا كىرىسەدى. بىلتىر جۇگەرىنىڭ ءار كەلىسىنە 126 تەڭگەدەن تولەنگەن بولاتىن. بۇل شارۋالاردى ىنتالاندىرىپ، ەگىستىك القاپتىڭ كولەمىن ۇلعايتۋعا سەرپىن بەرگەن ەدى. الايدا بيىلعى باعا كوڭىلدەن شىقپاي تۇر. قازىر زاۋىت جۇگەرىنى 15 پايىز ىلعالدىلىقپەن 80 تەڭگەدەن قابىلداپ جاتىر. 15 پايىز دەگەن - جوعارى ساپالى جۇگەرى. پايىزىنا قاراي قۇنى دا وزگەرەدى. مىسالى، 15-22 پايىز ىلعالدىلىقپەن وتكىزگەن ونىمگە 75 تەڭگە، ال 22 پايىزدان جوعارى دانگە 70 تەڭگە عانا تولەنىپ وتىر. وكىنىشتىسى، شارۋالارىمىز شىعىنعا باتايىن دەپ تۇر، - دەيدى پانفيلوۆ اۋدانىنىڭ اكىمى مارات ساعىمبەك.

جالپى، رەسەيگە سالىنعان ەكونوميكالىق سانكتسيالاردان كەيىن قازاقستان نارىعىنداعى اۋىل شارۋاشىلىعى داقىلدارى ءونىمىنىڭ باعاسى كۇرت تومەندەپ، وتاندىق ونەركاسىپ پەن شارۋالاردىڭ ەڭبەگى اقتالماي وتىرعانى جاسىرىن ەمەس.

وعان جەتىسۋلىق شارۋالاردىڭ جانايقايى كۋا. بۇعان ءتۇرلى سەبەپ بار. بىرىنشىدەن، الەم بويىنشا استىق ونىمدەرىنىڭ داعدارىسى شەگىنە جەتكەنىنە قاراماستان ازىق-تۇلىك ءوندىرىسى ونىمدەرىنىڭ قۇنى ەداۋىر ارزانداپ كەلەدى.

مىسالى، بيىل دۇنيەجۇزىلىك نارىقتاعى بيداي باعاسى - 14 پايىزعا، ال جۇگەرى باعاسى - 23 پايىزعا تومەندەگەنى تۋرالى ستاتيستيكا بار.

ەكىنشىدەن، وتاندىق نارىققا باعىتتالعان ەكسپورتتىڭ قارقىنى جىلدام كوبەيۋ ۇستىندە.

ايتالىق، ەكونوميكالىق سانكتسيا قىسپاعىنداعى رەسەيدىڭ اگروونەركاسىپ ونىمدەرىنىڭ قۋاتى تومەندەۋدىڭ ورنىنا ارتا تۇسكەن. بۇرىنعىداي الەمدىك ساۋدا-ساتتىققا شىعۋدىڭ جولى كەسىلگەن كورشى ەلدىڭ ءونىمى الدىمەن ءبىزدىڭ نارىقتى جاۋلايتىنى انىق.

بۇل جاعداي كوپتەگەن اۋىل شارۋاشىلىعى تاۋارىن وندىرۋشىلەرگە وڭاي سوقپاي تۇر. دەمەك، جۇگەرى دايىنداۋ ىسىندەگى ديقانداردىڭ ەڭبەگى ەش بولاتىنداي ءجونى بار.

قازىر رەسەيدىڭ ىشكى وندىرىسىندەگى جۇگەرى وڭدەۋ مەن ءونىمىن شىعارۋ ۇلەسى ارتقانى ايتىلۋدا.

مىسالى، وتكەن جىلدىڭ ەسەپتى كەزەڭىمەن سالىستىرعاندا ءبىرقاتار كاسىپورىنداردىڭ ءونىم كولەمى كۇرت وسكەن.

ونىڭ ىشىندە جۇگەرى كراحمالىن وڭدەيتىن «چاپلىگينسكيي» كراحمال زاۋىتىنىڭ ءونىمى - 98 پايىزعا، «حوبوتوۆسكي» كراحمال ءونىمى كاسىپورنى - 83,2 پايىزعا جۇگەرى ۇنىن ارتىق ءوندىرىپتى.

ال وتاندىق شارۋالار وسىرگەن جۇگەرىنى نەگىزىنەن جاركەنت كراحمال سىرنە زاۋىتى قابىلدايدى. مۇندا 250 ادام تۇراقتى جۇمىسپەن قامتىلعان.

دايىن ءونىمنىڭ 60 پايىزىن ەلىمىزدىڭ وندىرىستىك كاسىپورىندارى تۇتىنسا، قالعانى الىس- جاقىن شەتەلدەرگە ەكسپورتتالادى.

سوڭعى جاڭالىقتار