جەتىسۋدان تابىلعان ورتاعاسىرلىق قالاعا ءالى ساراپتاما جاسالعان جوق
تالدىقورعان. KAZINFORM - قازاقستاندىق زەرتتەۋشىلەر جەتىسۋ وڭىرىنەن بۇرىن بەلگىسىز بولىپ كەلگەن ورتاعاسىرلىق قالانىڭ ورنى بولۋى ىقتيمال جاڭا ارحەولوگيالىق نىسان تاپقانىن حابارلادى.
- بۇگىنگى كۇن بەكەر وتكەن جوق - ءبىز بۇرىن تەك جازبا دەرەكتەردەن عانا بەلگىلى بولعان ورتاعاسىرلىق قالانىڭ ورنىن تاپتىق دەپ ويلايمىز. ارحەولوگتار بۇل تۋرالى حاباردار، - دەلىنگەن پەتروگليفتەر زەرتتەۋشى توپتىڭ وكىلى ولگا گۋميروۆانىڭ جولكۇندەلىگىندەگى جازبادا.
سونىمەن قاتار بۇل نىسان العاش رەت ءبىر كارەر اۋماعىندا بايقالعان. عالىمدار جەر بەتىنەن شىعىپ تۇرعان كۇيدىرىلگەن كىرپىش پەن قابىرعا قالدىقتارىن، سونداي-اق ءىشىنارا ساقتالعان مۇنارانى انىقتاعان. الدىن الا بولجام بويىنشا، قالا XIII عاسىرداعى موڭعول شاپقىنشىلىعى كەزىندە ورتەلىپ، قيراتىلعان.
زەرتتەۋشىلەردىڭ ايتۋىنشا، بۇل ارحەولوگيالىق كەشەن كولەمى مەن ماڭىزدىلىعى جاعىنان تالحيز نەمەسە قويلىق قالاشىعىنا تەڭ.
- جەتىسۋ وبلىسىنىڭ اكىمدىگىنە قۇتتى بولسىن ايتامىز - ەندى ۇلى جىبەك جولىنىڭ بويىندا تاعى ءبىر تاريحي نىسان بار. وكىنىشكە قاراي، قالاشىقتىڭ ءبىر بولىگى كارەرمەن بۇلىنگەن، ال كەي تۇستارى زاڭسىز قوقىس الاڭىنا اينالعان، - دەيدى زەرتتەۋشىلەر.
وسى ماسەلەگە قاتىستى KAZINFORM ءتىلشىسى الكەي مارعۇلان اتىنداعى ارحەولوگيا ينستيتۋتىنا حابارلاسىپ، جاعدايدىڭ ءمان- جايىن انىقتاۋعا تىرىستى.
اتالعان دەرەك بويىنشا تۇسىنىكتەمە بەرگەن اتالعان ينستيتۋتتىڭ عىلىمي قىزمەتكەرى الەكساندر گورياچيەۆ جەتىسۋ ايماعىنىڭ عىلىمي قىزىعۋشىلىق تۋدىراتىن اۋماق ەكەنىن اتاپ ءوتتى. ونىڭ ايتۋىنشا، بۇل وڭىردە ول ينستيتۋت ارحەولوگيالىق زەرتتەۋ جۇمىستارىن سوڭعى 30 جىل بويى جۇيەلى تۇردە جۇرگىزىپ كەلەدى.
- ءيا، ءبىز بۇل ماڭنان تابىلعان كىرپىش قالدىقتارى تۋرالى حاباردارمىز. الايدا قازىرگى ۋاقىتتا بۇل نىسانعا قاتىستى رەسمي ارحەولوگيالىق ساراپتاما جاسالعان جوق. سايكەسىنشە، ول تۋرالى ناقتى عىلىمي تۇجىرىم ايتۋ ەرتە. فوتوسۋرەتتەرگە قاراعاندا، تابىلعان كىرپىشتەر ورتاعاسىرلىق ستاندارتتارعا سايكەس كەلمەيدى، - دەيدى ا. گورياچيەۆ.
سونىمەن قاتار ول بيىل تامىز ايىنىڭ سوڭىنا قاراي وسى اۋماقتا كەشەندى عىلىمي زەرتتەۋ جۇمىستارى جۇرگىزىلەتىنىن اتاپ ءوتتى.
ەسكە سالا كەتەيىك، جەتىسۋدا ساق ءداۋىرىنىڭ قورعاندارى زاڭسىز قازىلىپ، بۇلىنگەنىن جازعانبىز.
اۆتور
تاستان تويانوۆ
