جەتىسۋدا ساق ءداۋىرىنىڭ قورعاندارى زاڭسىز قازىلىپ، بۇلىنگەن
تالدىقورعان. KAZINFORM - جەتىسۋ وبلىسىنىڭ پانفيلوۆ اۋدانىندا كونە ساق داۋىرىنە تيەسىلى قورعاندار تونالدى. بۇل تۋرالى جەتىسۋ وبلىسىنىڭ تاريحي-مادەني مۇرانى قورعاۋ ورتالىعى مالىمدەدى.
بەلگىلى بولعانداي، جاركەنت قالاسىنان شامامەن 100 شاقىرىم قاشىقتىقتا ورنالاسقان قورعانداردى بەلگىسىز بىرەۋلەر اۋىر تەحنيكا كومەگىمەن قازىپ، تاريحي-مادەني مۇرانى بۇلدىرگەن.
العاشقى بولىپ بۇل جاعدايدى جەرگىلىكتى تۇرعىن ولەگ تيحوميروۆ بايقاپ، ءتيىستى ورگاندارعا حابارلاعان. ونىڭ ايتۋىنشا، قورعاندار شامامەن ءبىر اي بۇرىن زاقىمدالعان.
ورتالىق ماماندارىنىڭ پىكىرىنشە، بۇل قورعانداردا سكيف ءداۋىرىنىڭ كوسەمدەرى جەرلەنىپ، سول كەزەڭگە ءتان قۇندى بۇيىمدار، سونىڭ ىشىندە التىن ارتەفاكتىلەر بولۋى مۇمكىن.
- زاڭسىز ارحەولوگيالىق جۇمىستارمەن اينالىساتىن ادامدار ەل تاريحىنا ورنى تولماس زيان كەلتىردى. ءبىز بۇل فاكت بويىنشا قۇقىق قورعاۋ ورگاندارىنا رەسمي جۇگىندىك، - دەدى ەسكەرتكىشتەردى قورعاۋ ورتالىعىنىڭ ديرەكتورى عالىمجان وسپانوۆ.
سونىمەن قاتار قورعاندار مەملەكەت قورعاۋىندا بولعانىنا قاراماستان، قىلمىسكەرلەر زاڭدى اينالىپ ءوتىپ، بۇل ارەكەتتى جۇزەگە اسىرعان.
قازىرگى ۋاقىتتا جەرگىلىكتى اتقارۋشى ورگاندار ارحەولوگيالىق ەسكەرتكىشتەردى قورعاۋ شارالارىن كۇشەيتۋ ماسەلەسىن قاراستىرىپ جاتىر.
سونداي-اق اتالعان وقيعا بويىنشا پوليتسيا تاراپىنان ۆانداليزم بابى بويىنشا قىلمىستىق ءىس قوزعالدى.
- قازىرگى كەزدە تەرگەۋ ءىس- شارالارى جۇرگىزىلىپ جاتىر. قالعان اقپارات قىلمىستىق- پروتسەستىك كودەكستىڭ 201-بابىنا سايكەس جاريالانبايدى، - دەدى جەتىسۋ وبلىسى پوليتسيا دەپارتامەنتىنىڭ باسپا ءسوز قىزمەتى.
ايتا كەتەيىك، بۇعان دەيىن الماتىدا مەملەكەت قورعاۋىنا الىنعان قانشا ەسكەرتكىش بار ەكەنىن جازعانبىز.
اۆتور
تاستان تويانوۆ
