07:45, 26 - اقپان 2024 | GMT +6
جەتىسۋدا جول اپاتىنان ەكى ادام قازا تاپتى
تالدىقورعان. KAZINFORM - كوكسۋ اۋدانىنداعى الماتى-وسكەمەن اۆتوجولىنىڭ 211 شاقىرىمىندا جول اپاتى بولدى.
ءى ءى م باسپا ءسوز قىزمەتىنىڭ مالىمەتىنشە، Toyota Camry جۇرگىزۋشىسى رۋلدى باسقارا الماي، كولىكتىڭ اۋدارىلۋىنا جول بەرگەنى الدىن الا انىقتالدى. جول اپاتى سالدارىنان جۇرگىزۋشى مەن ونىڭ جولاۋشىسى وقيعا ورنىندا كوز جۇمدى. تاعى ەكەۋى ءتۇرلى جاراقاتتارمەن وبلىستىق اۋرۋحاناعا جاتقىزىلدى.
اتالعان فاكتى بويىنشا قاجەتتى ساراپتامالار تاعايىندالىپ، تەرگەۋ امالدارى باستالدى.
«قۇرمەتتى جۇرگىزۋشىلەر، جول قوزعالىسى ەرەجەلەرىن قاتاڭ ساقتاڭىزدار، جىلدامدىقتى شەكتەن اسىرماڭىزدار»، - دەپ ەسكەرتتى توتەنشە جاعدايلار مينيسترلىگىنەن.
