جەتىسۋدا ءدىني ەكسترەميزمگە قاتىسى بار كۇدىكتىلەردەن ەسىرتكى تاركىلەندى
تالدىقورعان. KAZINFORM - وبلىستىق پوليتسيا دەپارتامەنتىنىڭ مالىمەتىنشە، تەرگەۋ بارىسىندا كۇدىكتىلەردىڭ ەكەۋى ءدىني ەكسترەميزم يدەولوگياسىن ۇستانۋشىلار ەكەنى انىقتالدى.
سارقان اۋدانى اۋماعىندا پوليتسيا دەپارتامەنتى مەن ۇ ق ك قىزمەتكەرلەرى پروكۋراتۋرانىڭ ۇيلەستىرۋىمەن بىرلەسە جۇرگىزگەن وپەراتسياسىنىڭ ناتيجەسىندە ەسىرتكى زاتتارىنىڭ زاڭسىز اينالىمىنا قاتىسى بار دەگەن كۇدىكپەن 3 جەرگىلىكتى تۇرعىن ۇستالدى.
وبلىستىق پوليتسيا دەپارتامەنتىنىڭ مالىمەتىنشە، تەرگەۋ بارىسىندا كۇدىكتىلەردىڭ ەكەۋى ءدىني ەكسترەميزم يدەولوگياسىن ۇستانۋشىلار ەكەنى انىقتالدى. ءتىنتۋ كەزىندە ولاردان ءىرى كولەمدە «ماريحۋانا» ەسىرتكى زاتى تاركىلەندى. سونىمەن قاتار، قازاقستان رەسپۋبليكاسىنىڭ اۋماعىندا اكەلۋگە، شىعارۋعا جانە تاراتۋعا تىيىم سالىنعان ەكسترەميستىك مازمۇنداعى ءدىني ادەبيەتتەر تابىلىپ، تاركىلەندى.
- قازىرگى ۋاقىتتا قۇقىق قورعاۋ ورگاندارى بارلىق ءمان-جايدى انىقتاۋ ءۇشىن سوتقا دەيىنگى تەرگەۋ امالدارىن جۇرگىزۋدە، - دەدى جەتىسۋ وبلىستىق پوليتسيا دەپارتامەنتى.
پوليتسيا ەسىرتكى قۇرالدارىن تاراتۋ مەن پايدالانۋ، سونداي-اق ەكسترەميستىك ماتەريالداردى ساقتاۋ جانە تاراتۋ - قاتاڭ قىلمىستىق جاۋاپكەرشىلىككە اكەلەتىن اۋىر قۇقىق بۇزۋشىلىقتار ەكەنىن ەسكەرتەدى.
ەسكە سالايىق، وسىعان دەيىن جەتىسۋدا 21 جاستاعى ازاماتتان 111 ورام ەسىرتكى تاركىلەنگەنىن جازعانبىز.
