جەتىسۋدا ءبىر كۇندە ەكى بالا سۋعا باتىپ كەتتى

تالدىقورعان. قازاقپارات - 19-ماۋسىمدا جەتىسۋ وبلىسى قاراتال اۋدانىنىڭ اۋماعىندا ەكى بىردەي جازاتايىم وقيعا تىركەلىپ، سالدارىنان كامەلەتكە تولماعان ەكى بالا قازا تاپتى. بۇل تۋرالى ءوڭىردىڭ توتەنشە جاعدايلار دەپارتامەنتىنىڭ باسپا ءسوز قىزمەتى حابارلادى.

- العاشقى وقيعا ۇشتوبە قالاسىنىڭ ماڭىندا قاراتال وزەنىنىڭ جاعاسىندا بولعان. 2018 -جىلى تۋعان قىز بالا اتا-اناسىمەن بىرگە دەمالىپ جۇرگەن كەزدە سۋعا باتىپ كەتكەن. وقيعا شومىلۋعا رۇقسات ەتىلمەگەن، ارنايى بەلگىلەر ورناتىلعان، ءبىراق جابدىقتالماعان ۋچاسكەدە بولعان. قۇتقارۋشىلارعا حابار ساعات 13:30- دا كەلىپ تۇسكەن. بالا دەنەسىن ت ج د قىزمەتكەرلەرى ساعات 14:00 شاماسىندا سۋدان الىپ شىققان، - دەلىنگەن حابارلامادا.

ت ج د رەسمي مالىمەتىنشە، ەكىنشى وقيعا ءدال سول كۇنى قوجبان اۋىلىندا تىركەلگەن. 2007 -جىلى تۋعان جاس ءوسپىرىم ابايسىزدا قاراتال وزەنىنە قۇلاپ، باتىپ كەتكەن. جەرگىلىكتى تۇرعىندار جاس ءوسپىرىمنىڭ دەنەسىن ساعات 14:30 شاماسىندا وزدەرى سۋدان الىپ شىققان.

- جەتىسۋ وبلىسىنىڭ توتەنشە جاعدايلار دەپارتامەنتى قازا تاپقان بالالاردىڭ تۋىستارى مەن جاقىندارىنا قايعىرا كوڭىل ايتادى جانە تۇرعىنداردى سۋ قويمالارى ماڭىنداعى قاۋىپسىزدىك ەرەجەلەرىن قاتاڭ ساقتاۋعا شاقىرادى، - دەلىنگەن حابارلامادا.

ەسكە سالا كەتەيىك، جەتىسۋدا شومىلۋ ماۋسىمىنىڭ باستالۋىنا وراي سۋ ايدىندارىندا ازاماتتاردىڭ قاۋىپسىزدىگىن قامتاماسىز ەتۋ ماقساتىندا پروفيلاكتيكالىق شارالار كۇشەيتىلگەنىن جازعانبىز.

اۆتور

تاستان تويانوۆ