جەتىسۋدا 600 گە جۋىق ايەل جاتىر موينى وبىرىمەن ەسەپتە تۇر

جەتىسۋ وبلىسىندا ادام پاپيلومما ۆيرۋسىنا قارسى ەكپە جالعاسۋدا، دەپ حابارلايدى El.kz اقپارات اگەنتتىگى.

جاتىر موينى وبىرىنان ايەل ادامداردىڭ قايتىس بولۋ دەرەگى جىل سايىن كوبەيگەنىنە بايلانىستى بيىل ادام پاپيلومماسى ۆيرۋسىنا قارسى ەكپە ۇلتتىق كۇنتىزبەگە ەنگىزىلگەن بولاتىن. قىركۇيەك ايىنان باستالعان ۆاكسيناتسيا ءالى كۇنگە دەيىن جالعاسىپ جاتىر. بۇل تۋرالى وڭىرلىك كوممۋنيكاتسيالار قىزمەتىنىڭ باسپا ءسوز كونفەرەنسياسىندا وبلىستىڭ سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ينديرا كۇنباسوۆا جانە ونكوگينەكولوگ دارىگەر قۋانىش ەرگەمبەكوۆ ايتتى.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، جاتىر موينى وبىرلارىنىڭ %95 ى ا پ ۆ-دان تۋىندايدى. بۇل اۋرۋدىڭ الدىن الۋدىڭ ءتيىمدى ءادىسى - ۆاكسيناتسيا. ۆيرۋسقا قارسى «گارداسيل» ۆاكسيناسى 15 جىلدان استام ۋاقىت بويى پايدالانىلىپ كەلەدى. ول وزبەكستان، قىرعىزستان، تۇركىمەنستاندى قوسا ەسەپتەگەندە 135 ەلدىڭ ۇلتتىق يممۋنداۋ باعدارلامالارىنا ەنگىزىلگەن.

بۇگىندە جەتىسۋ وبلىسىنا ۆاكسينانىڭ 12 مىڭ دوزاسى اكەلىنگەن. ول قىز بالالارعا ەكى كەزەڭ ارقىلى سالىنادى. قازىرگى ۋاقىتتا 3880 قىز بالاعا ەكپە سالىنعان. ۆاكسيناتسيادان كەيىن جاعىمسىز اسەرلەر تىركەلمەگەن.

ايتا كەتەيىك، جەتىسۋ وبلىسىندا 600 گە جۋىق ايەل ادام جاتىر موينى وبىرىمەن ەسەپتە تۇر. ونىڭ ەڭ جاسى - 24 جاستا.