22:46, 07 - ناۋرىز 2024 | GMT +6
جەتىسۋ وبلىسىندا ورتەنىپ جاتقان پاتەردەن ەكى بالا قۇتقارىلدى
الماتى. KAZINFORM - جەتىسۋلىق قۇتقارۋشىلار ورتەنىپ جاتقان پاتەردەن ەكى بالانى قۇتقاردى.
وبلىستىق توتەنشە جاعدايلار دەپارتامەنتىنىڭ مالىمەتىنشە، 7-ناۋرىز كۇنى ساعات 10:18 دە الاكول اۋدانى ءۇشارال قالاسىنداعى كوپقاباتتى تۇرعىن ۇيلەردىڭ بىرىندە پاتەر ورتەنىپ جاتقانى تۋرالى حابارلاما كەلىپ تۇسكەن.
«قابىلدانعان شارالار بارىسىندا باسپالداق مارشى ارقىلى ەكى ازامات قۇتقارىلدى. ءۇش تىزەلى باسپالداق ارقىلى ەكى بالا قۇتقارىلىپ، جەدەل مەديتسينالىق كومەك قىزمەتكەرلەرىنە تاپسىرىلدى»، - دەپ حابارلادى ۆەدومستۆودان.
ءورت ءسوندىرۋ بولىمدەرى كەلگەنگە دەيىن 40 ازامات، ونىڭ ىشىندە 16 بالا تۇرعىن ۇيدەن ءوز بەتىنشە ەۆاكۋاتسيالانعان. 20 شارشى مەتر اۋماقتى قامتىعان ءورت ساعات 10:57 دە ءسوندىرىلدى.
ءورتتىڭ شىعۋ سەبەبى انىقتالىپ جاتىر.
