جەتىسۋ وبلىسىندا تۋبەركۋلەز جۇقتىرعان ناۋقاس سانى كوبەيدى

بيىل ەلىمىز بويىنشا تۋبەركۋلەز تاياقشاسىن جۇقتىرعانداردىڭ سانى 7 مىڭ ادامنان اسقان. قۇرت اۋرۋىمەن اۋىرعاندار سانى جەتىسۋ وبلىسىندا دا ازايماي وتىر، دەپ حابارلايدى Kazinform.

الەم مەديتسيناسى الەۋمەتتىك اۋرۋ ساناتىنا جاتقىزاتىن تۋبەركۋلەز دەرتىن تولىق اۋىزدىقتاۋ ءالى كۇنگە مۇمكىن بولماي وتىر. كوح تاياقشاسىن جاڭادان جۇقتىرۋشىلار لەگى دە كوبەيىپ كەلەدى ەكەن.

دارىگەرلەردىڭ مالىمەتىنشە، جىل باسىنان بەرى جەتىسۋ وبلىسىندا اۋرۋدىڭ العاشقى بەلگىلەرى 224 ادامنان انىقتالعان.

- وڭىردە بيىل تۋبەركۋلەز جۇقتىرۋدىڭ 224 جاعدايى تىركەلدى. سىرقات تانۋ دەڭگەيى وتكەن جىلدىڭ سايكەس كەزەڭىمەن سالىستىرعاندا 11 جاعدايعا كوبەيدى. قازىرگى ۋاقىتتا وبلىس بويىنشا ەپيدەميالىق جاعداي تۇراقتى بولعانىمەن، ينفەكتسيانىڭ تارالۋىنا ىقپال ەتەتىن كوپتەگەن ماسەلەلەر بار. مىسالى، تۋبەركۋلەزدىڭ دارىگە ءتوزىمدى تۇرلەرىنىڭ جوعارى ۇلەسى، حالىقتىڭ سانيتارلىق ساۋاتتىلىعىنىڭ جەتكىلىكسىزدىگى جانە ادامنىڭ ءوز دەنساۋلىعىنا نەمقۇرايلى قاراۋى اۋرۋدى جىلدام جۇقتىرۋعا ىقپال ەتۋى مۇمكىن، - دەيدى جەتىسۋ وبلىسى دەنساۋلىق ساقتاۋ باسقارماسى باسشىسىنىڭ ورىنباسارى جانەتا نۇرمانبەتوۆا.

ماماننىڭ ايتۋىنشا، اعزاداعى يممۋندىق جۇيەسى السىرەگەن ادامدار تۋبەركۋلەزدى جۇقتىرۋ قاۋپىنە كوبىرەك ۇشىرايدى. اۋرۋدىڭ دامۋى بىرنەشە ايعا دەيىن بىلىنبەي سوزىلادى. جالپى، تۋبەركۋلەزدىڭ جۇقپالى تۇرىمەن اۋىرعان ءبىر ناۋقاس وقشاۋلانباسا، ول 10-15 ادامعا ينفەكسيا جۇقتىرۋى مۇمكىن ەكەن.