جەتىسۋ وبلىسىندا كۇيەۋى ايەلىن ءولتىردى دەگەن كۇدىككە ءىلىندى

الماتى. KAZINFORM - جەتىسۋلىق تۇرعىن ايەلىن ۇرىپ ءولتىردى. قىلمىس 21-ماۋسىم ءتۇنى بولعان. بۇل تۋرالى Kazinform اگەنتتىگىنىڭ تىلشىسىنە مارقۇمنىڭ تۋىستارى ايتتى.

- اقسۋ اۋدانىنا قاراستى بالاساز اۋىلىندا تۇراتىن ءسىڭلىم ايزات مارات قىزى 21-ماۋسىمنان 22-ماۋسىمعا قاراعان ءتۇنى كۇيەۋىنىڭ سوققىسىنان كوز جۇمدى. كۇيەۋبالا ونى كورشىسىنىڭ كولىگىمەن سۋىقساي اۋىلىنداعى اتا-اناسىنىڭ ۇيىنە اپارعان. كەيىن جانسۇگىر كەنتىندەگى اۋداندىق اۋرۋحاناعا جەتكىزگەن. الايدا وندا جوندەۋ جۇمىستارى ءجۇرىپ جاتقاندىقتان، تالدىقورعانداعى كوپسالالى اۋرۋحاناعا الىپ بارعان، - دەيدى اپكەسى راۋشان دارىمبەكوۆا.

ونىڭ ايتۋىنشا، قولدارىندا دارىگەر قورىتىندىسى بار.

- قورىتىندىعا سايكەس، ەمدەۋ مەكەمەسىنە جەتكىزىلگەن كەزدە پۋلسى سوقپاعان، قان قىسىمى بولماعان - ءبارى ءنول. سوعان قاراماستان «كومادا جەتكىزىلدى» دەپ جازىپ قويعان. اۋرۋحانا ەشقانداي ناقتى اقپارات بەرمەي وتىر. ەرتەڭىندە ەنەسى كەلىپ، قارالى حاباردى جەتكىزدى. ايزاتتىڭ «جوعارعى قاباتتان قۇلاپ كەتكەنىن» ايتتى. ءبىراق ءبىز بۇعان سەنبەيمىز، - دەيدى ول.

وسى جاعدايعا قاتىستى جەتىسۋ وبلىستىق دەنساۋلىق ساقتاۋ باسقارماسىنا دا ساۋال جولدادىق.

- قايتىس بولعان ادامعا قاتىستى اقپاراتتى تەك پوليتسيا مەن سوت-مەديتسينالىق ساراپتامادان عانا الاسىزدار. تەرگەۋ ءجۇرىپ جاتىر. سوندىقتان، دەنساۋلىق ساقتاۋ باسقارماسى ەشقانداي اقپارات بەرە المايدى. وعان قۇقىعىمىز جوق، - دەپ جاۋاپ بەردى باسقارمانىڭ باسپا ءسوز قىزمەتىنەن.

ال، مارقۇمنىڭ تۋىستارى ءمايىتتى سوت-مەديتسينالىق ساراپتاماسىز العاندارىن ايتادى.

- مايىتحانادان ەشقانداي قۇجاتسىز الدىق. ءسىڭلىمنىڭ دەنەسىندە ساۋ جەر قالماعان. ءۇستى-باسى كوگالا قويداي كوگەرىپ كەتكەن. اشىق جاراقاتتار دا بار. بۇل - تۇرمىستىق زورلىق-زومبىلىقتىڭ ايقىن كورىنىسى. ول كۇيەۋىنىڭ قولىنان قازا تاپتى. تەرگەۋ ءادىل ءوتىپ، كىنالى ادام لايىقتى جازاسىن السا ەكەن. ارتىندا قان جۇتىپ قالعان اتا-اناسى مەن ەكى جاسقا دا تولماعان كىشكەنتاي قىزى قالدى، - دەيدى ول.

جەتىسۋ وبلىستىق پوليتسيا دەپارتامەنتى قازىر قىلمىستىق ءىس قوزعالىپ، تەرگەۋ امالدارى ءجۇرىپ جاتقانىن مالىمدەدى.

- اتالعان فاكتى بويىنشا پوليتسيا قىلمىستىق ءىس قوزعادى. كۇدىكتى ۇستالىپ، ۋاقىتشا ۇستاۋ يزولياتورىنا قاماۋعا الىندى. قازىر وقيعانىڭ بارلىق ءمان-جايى انىقتالىپ، تەرگەۋ جۇرگىزىلىپ جاتىر. تەرگەۋ مۇددەسىنە بايلانىستى باسقا اقپارات جاريالاۋعا جاتپايدى، - دەلىنگەن ۆەدومستۆو جاۋابىندا.

وسىعان دەيىن الماتىدا زاڭگەر ايەلدى پىشاقتاپ ولتىرگەن بۇرىنعى كۇيەۋى 11 جىلعا سوتتالعانى تۋرالى جازعانبىز.