جەتىسۋ وبلىسىندا 1 مىڭعا جۋىق ناۋقاستان قاتەرلى ىسىك انىقتالدى

جەتىسۋ وبلىسىندا وتكەن 9 ايدا ونكولوگيالىق سىرقات بەلگىسى بار 6685 ادام تىركەۋگە الىنعان. ونىڭ ىشىندە 1 مىڭعا جۋىق ناۋقاستان قاتەرلى ىسىك انىقتالىپ وتىر، - دەپ حابارلايدى Kazinform.

وكىنىشكە قاراي، بىلتىرعى جىلمەن سالىستىرعاندا بيىل ونكولوگيالىق تىركەۋگە الىنعان ناۋقاستاردىڭ سانى 4,2 پايىزعا كوبەيگەن. انىقتالعان قاتەرلى دەرتتىڭ بەلگىلەرى ادامداردىڭ جوسپارلى سكرينينگتەن ءوتۋ كەزىندە بىلىنگەن. دارىگەرلەردىڭ دەرەگى بويىنشا ناۋقاستار ونكولوگيانىڭ ءسۇت بەزى، جاتىر مويىنى جانە اسقازاننىڭ قاتەرلى ىسىگى سياقتى اۋىر تۇرىنە ءجيى شالدىعادى ەكەن.

- قاتەرلى ىسىكتى ەرتە كەزەڭدە انىقتاۋ دەرتتى ەمدەۋدەگى ماڭىزدى قادامداردىڭ ءبىرى. ونىڭ جولى دارىگەرگە دەر كەزىندە قارالىپ، جوسپارلى سكرينينگتەن ءوتىپ تۇرۋ ەكەنىن ەستەن شىعارماۋىمىز كەرەك. جىل باسىنان بەرى وبلىستاعى سكرينينگتىك جوسپاردىڭ ورىندالۋى 81,7 پايىزدى قۇرادى. ناتيجەسىندە جاتىر موينى وبىرىنا شالدىققان 12 ادام، ءسۇت بەزى وبىرىنىڭ بەلگىسى بار 32 ناۋقاس انىقتالدى. بۇل جاعدايدا ەرتە ەم قابىلداۋعا مۇمكىندىك بار، دەرتتەن قۇلان- تازا ايىعۋعا دا ءۇمىت زور. اسىرەسە، ءسۇت بەزىنىڭ قاتەرلى ىسىگى ايەلدەردە ءجيى كەزدەسەدى. تىركەۋدەگى ونكولوگيالىق اۋرۋلاردىڭ 16 پايىزىن قۇرايدى. سوندىقتان 40 پەن 70 جاس ارالىعىنداعى ايەلدەر ءسۇت بەزىنىڭ قاتەرلى ىسىگىن انىقتايتىن سكرينينگتەن مىندەتتى تۇردە ءوتۋى كەرەك. جىل باسىنان بەرى بىزدە 30 مىڭعا جۋىق ايەل تەكسەرىلىپ، 4829 ناۋقاستان ىسىك بەلگىلەرى انىقتالدى. وكىنىشتىسى، اۋرۋدىڭ قاتەرلى اعىمى 32 ايەلدەن راستالدى، - دەيدى جەتىسۋ وبلىستىق كوپسالالى ەمحاناسى ديرەكتورىنىڭ ورىنباسارى گۇلايىم ورازبەكوۆا.

اۆتور

قالماحانبەت مۇقامەتقالي