جەتىسۋ جانە اباي وبلىستارىندا رەسپۋبليكالىق ماڭىزى بار جولدار جابىلدى

استانا. KAZINFORM - اۋا رايىنىڭ قولايسىزدىعىنا بايلانىستى جەتىسۋ جانە اباي وبلىستارى اۋماعىندا رەسپۋبليكالىق ماڭىزى بار اۆتوجولدىڭ ءبىرقاتار ۋچاسكەسىندە كولىك قوزعالىسىنا ۋاقىتشا شەكتەۋ قويىلدى.

15-جەلتوقسان كۇنى ساعات 10:00 دەن باستاپ جەتىسۋ وبلىسىندا «الماتى - تالدىقورعان - وسكەمەن - شەمونايحا - ر ف شەكاراسى» اۆتوجولىنىڭ 561-615-شاقىرىم ارالىعىنداعى ۋچاسكەسىندە، ياعني ءۇشارال قالاسىنان اباي وبلىسىنىڭ شەكاراسىنا دەيىن كولىكتىڭ بارلىق ءتۇرىنىڭ قوزعالىسى توقتاتىلدى.

وسى كۇنى، ساعات 10:00-دەن باستاپ ءدال وسى اۆتوجولدىڭ اباي وبلىسى اۋماعىنداعى 615-683-شاقىرىم ارالىعىندا دا (جەتىسۋ وبلىسىنىڭ شەكاراسىنان تاسكەسكەن اۋىلىنا دەيىن) بارلىق كولىك قوزعالىسىنا شەكتەۋ ەنگىزىلدى.

- الدىن الا مالىمەت بويىنشا، اتالعان جول ۋچاسكەلەرىن 15-جەلتوقسان كۇنى ساعات 20:00-دە قايتا اشۋ جوسپارلانىپ وتىر، - دەپ جازدى قازاۆتوجولدان.

جول قىزمەتتەرى مەن ءتيىستى ورگاندار جۇرگىزۋشىلەرگە الىس ساپارعا شىقپاس بۇرىن اۋا رايى جاعدايىن جانە جول احۋالىن ناقتىلاپ الۋدى ەسكەرتەدى.

اۆتور

اسحات رايقۇل