جەتىم بالالارعا تيەسىلى ۇيلەردە باسقا ادامدار زاڭسىز تۇرىپ كەلگەن
پەتروپاۆل. KAZINFORM - سولتۇستىك قازاقستان وبلىسىنىڭ پروكۋرورلارى اتا-انانىڭ قامقورىنسىز قالعان بالالاردىڭ قۇقىقتارىن قورعادى.
س ق و پروكۋراتۋراسىنىڭ مالىمەتىنشە، اتا-انا قامقورلىعىنسىز قالعان بالالار مۇلكىنىڭ ساقتالۋىنا ۋاكىلەتتى ورگاندار جاۋاپتى. الايدا قاداعالاۋشى ورگاننىڭ تەكسەرىسى بارىسىندا ورەسكەل زاڭ بۇزۋ انىقتالدى.
ايىرتاۋ اۋدانىندا بالالاردى قولداۋ ورتالىعى ورنالاسقان. مۇندا ءقازىر لوبانوۆو اۋىلىنداعى تۇرعىن ۇيدە ۇلەسى بار كامەلەتكە تولماعان التى بالا تاربيەلەنىپ جاتىر.
ۋاكىلەتتى ورگان وزىنە جۇكتەلگەن مىندەتتى تولىق ورىنداماعان، ياعني ۇزاق ۋاقىت بويى مۇلىكتىڭ نە جاعدايدا تۇرعانىن بىلمەگەن.
سالدارىنان بۇل تۇرعىن ۇيگە 2024 -جىلدىڭ تامىزىنان باستاپ زاڭدى نەگىزسىز بەيتانىس ادام قونىستانعان.
مامليۋت اۋدانىندا «تۇرعىن ءۇي قاتىناستارى تۋرالى» زاڭنىڭ تالاپتارىن بۇزا وتىرىپ، جەتىم بالالارعا ارنالعان 2 كوممۋنالدىق پاتەردە باسقا ادامدار تۇرىپ كەلگەن.
ال، اقجار اۋدانىنداعى بالالاردى قولداۋ ورتالىعى تاربيەلەنۋشىسىنىڭ اكەسى قايتىس بولعاننان كەيىن وعان وبلىستاعى اۋىل شارۋاشىلىعى كاسىپورىندارىنىڭ بىرىندە جەر ۇلەسى قالعان.
قۇرىلتاي قۇجاتتارىنا سايكەس كامەلەتكە تولماعان ادامنىڭ بانك شوتىنا جىل سايىن الەۋمەتتىك كومەك (پايلىق ديۆيدەندتەر) كەلىپ ءتۇسۋى ءتيىس. الايدا، ۋاكىلەتتى ورگان تاراپىنان باقىلاۋدىڭ بولماۋىنا بايلانىستى 2024 -جىلى تولەم جەتىم بالانىڭ بانكتىك شوتىنا تۇسپەگەن.
پروكۋرورلاردىڭ ارالاسۋىنان كەيىن جەتىم جانە اتا-انا قامقورلىعىنسىز قالعان بالالاردىڭ قۇقىعى قورعالدى.
