جۇسىپبەك ايماۋىتوۆتىڭ 20-دان استام دراماتۋرگيالىق شىعارماسى تابىلدى
پاۆلودار. KAZINFORM - پاۆلوداردا «ار الداسپانى ايماۋىتوۆ» اتتى رەسپۋبليكالىق عىلىمي كونفەرەنسيا ءوتتى. ءىس-شارادا تۇلعانىڭ ءومىر جولى مەن قازاق تەاتر ونەرىنە سىڭىرگەن ەڭبەگى جايىندا باياندالدى.
بيىل كورنەكتى جازۋشى، دراماتۋرگ، پۋبليتسيست، قازاق ادەبيەتىنىڭ نەگىزىن قالىپتاستىرۋشىلاردىڭ ءبىرى، ەرتىس-بايان ءوڭىرىنىڭ تۋماسى جۇسىپبەك ايماۋىتوۆتىڭ تۋعانىنا 135 جىل تولدى.
تۇلعانىڭ مەرەيتويىنا وراي ج. ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترىنىڭ ۇيىمداستىرۋىمەن «ار الداسپانى ايماۋىتوۆ» اتتى رەسپۋبليكالىق عىلىمي كونفەرەنسيا وتكىزىلدى.
كونفەرەنسيا جۇمىسىنا ك س ر و حالىق ءارتيسى، قازاقستاننىڭ ەڭبەك ەرى، م. اۋەزوۆ اتىنداعى قازاق ۇلتتىق دراما تەاترىنىڭ كوركەمدىك جەتەكشىسى اسانالى ءاشىموۆ، ونەرتانۋ دوكتورى باقىت نۇرپەيىس، جۇسىپبەك ايماۋىتوۆتىڭ شوبەرەسى (جيەنشارى) پاۆەل ايماۋىتوۆ جانە جۇسىپبەكتانۋشى عالىمدار مەن قالامگەرلەر، تەاتر سالاسىنىڭ مايتالماندارى قاتىستى.
- تۇلعانىڭ باياناۋىل جەرىنەن تۇلەپ ۇشىپ، قازاق رۋحانياتى مەن مادەنيەتى ءۇشىن جاساپ كەتكەن جاقسىلىعىن الدەبىر دۇنيەمەن ولشەۋ مۇمكىن ەمەس. عالىم رەتىندە ومىرىندە اتقارعان ىستەرى ءبىر توبە. ال ۇلت جوقشىسى، حالىق پەداگوگيكاسىنىڭ شەبەرى، پۋبليتسيست، دراماتۋرگ رەتىندە اتقارعان ەڭبەكتەرىنىڭ جەمىسىن بۇگىنگى ۇرپاق ءالى دە كورىپ، سەزىنىپ وتىر، - دەپ اتاپ ءوتتى پاۆلودار وبلىسىنىڭ اكىمى ايگۇل ماليكوۆا قۇتتىقتاۋ سوزىندە.
ءىس-شارادا الاش قايراتكەرىنىڭ قازاق تەاتر ونەرىنە ەنگىزگەن جاڭاشىلدىعى، دراماتۋرگياداعى شىعارماشىلىق قىرى، تۇلعانىڭ ومىرىنە قاتىستى تىڭ مالىمەتتەر باياندالىپ، جۇسىپبەكتانۋ ماسەلەلەرى تالقىلاندى.
- بۇگىنگى قوعام - كىتاپ وقىمايتىن قوعام. دەمەك، وسى ورايدا تەاتردىڭ ەڭبەگى - ەرەكشە. ال كىتاپ وقىمايتىن، كەيىپكەردى تانىمايتىن ادامعا سول شىعارمانى ساحنالاۋ وڭاي ەمەس. تەاتردا پروزالىق شىعارمالاردى سومداۋ - وتە ماڭىزدى. بۇل باعىتتا ۇلكەن جۇمىستار اتقارىلۋى كەرەك. جۇسىپبەك ايماۋىتوۆتىڭ «اقبىلەك» شىعارماسى - بۇگىنگى كۇننىڭ وزەكتى ماسەلەسىن كورسەتەتىن، وي تۋدىراتىن شىعارما، - دەپ وي ءبولىستى م. اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
ال فيلولوگيا عىلىمدارىنىڭ كانديداتى، تورايعىروۆ ۋنيۆەرسيتەتى ءۇشتۇعىرلى ءتىل كافەدراسىنىڭ مەڭگەرۋشىسى، جۇسىپبەكتانۋشى عالىم ايمان زەينۋلينا الاش ارىسىنىڭ دراماتۋرگياداعى قىرى جايىندا باياندادى.
ايتۋىنشا، عالىمدار وسى ۋاقىتقا دەيىن تۇلعانىڭ 10-عا جۋىق دراماتۋرگيالىق شىعارماسى بار دەپ ەسەپتەپ كەلگەن. جۋىقتا تابىلعان ارحيۆتىك قۇجاتتاردان جۇسەكەڭنىڭ تەاترعا ارناپ 25-تەن استام شىعارما جازعانى انىقتالعان.
سوندىقتان دراماتۋرگتىڭ بۇل تۇرعىداعى ەڭبەكتەرى ءالى دە زەردەلەي ءتۇسۋدى قاجەت ەتەدى.
كونفەرەنسيادا سونداي-اق، ەۋرازيا ۇلتتىق ۋنيۆەرسيتەتىنىڭ وقىتۋشىسى مۇحيت وماروۆ، قالامگەر سەرىك ەلىكباي، اقىن، جازۋشى، «اقبەتتاۋ» جۋرنالىنىڭ رەداكتورى سايلاۋ بايبوسىن، باياناۋىلدىق ولكەتانۋشى رامازان نۇرعاليەۆ، ق ر ەڭبەك سىڭىرگەن ءارتيسى مۇحتارحان ماناپ ج. ايماۋىتوۆتىڭ قازاق تەاتر ونەرىن دامىتۋعا سىڭىرگەن ەڭبەگى جايىندا ءوز بىلگەندەرىمەن ءبولىستى.
ەسكە سالا كەتەيىك، باياناۋىلدا ايماۋىتوۆ قۇرعان «مادەني كىندىك» مەكەنىنە بەلگىتاس قويىلدى.
اۆتور
مۇرات اياعان
