جۇرگىزۋشى كۋرسىن ونلاين وقىتۋ توقتاتىلادى

استانا. KAZINFORM - جۇرگىزۋشى كۋالىگىن الۋعا ءوز بەتىنشە دايىندالۋ جانە ونلاين وقۋ تەتىگى جويىلدى. وقۋ كۋرسىن اياقتاعانى تۋرالى كۋالىكتى ەلەكتروندى نۇسقاعا تولىق كوشىرۋ جۇرگىزىلىپ جاتىر.

بۇل تۋرالى ق ر ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ايتتى.

«جۇرگىزۋشىلەردى دايارلاۋ ساپاسى سىن كوتەرمەيدى. تالداۋ كورسەتكەندەي، جول اپاتتارىنىڭ نەگىزگى سەبەبى ءالى دە كولىك ءتارتىبىنىڭ تومەندىگى بولىپ وتىر. كەلتىرىلگەن ساندار دا وسىنى دالەلدەيدى. مىسالى، 10 ميلليوننان استام جول ەرەجەسىن بۇزۋدىڭ جولىن كەسۋ نەمەسە 20 مىڭنان ماس جۇرگىزۋشىنى ۇستاۋ دەرەكتەرى سونى كورسەتەدى. حالىقتىڭ باسىم بولىگى - زاڭعا باعىناتىندار. ءبىراق ماس كۇيىندە كولىك جۇرگىزۋگە، جول ەرەجەسىن تۇراقتى تۇردە بۇزۋعا جول بەرەتىن حالىقتىڭ بەلگىلى ءبىر ساناتى پوليتسيانىڭ باقىلاۋىندا بولادى. بۇل جاعدايعا اۆتومەكتەپتەرگە قويىلاتىن تالاپتاردىڭ تومەندىگى جانە جۇرگىزۋشىلەردى دايارلاۋ ساپاسى ىقپال ەتكەن»، - دەدى كوميتەت باسشىسى.

سونداي-اق قايسار سۇلتانبايەۆ بۇدان بىلاي جۇرگىزۋشى كۋالىگىن الاردا وقۋ كۋرسىنىڭ كۋالىگىن الۋ تالاپتارى كۇشەيتىلەتىنىن اتاپ ءوتتى.

«جۇرگىزۋشىلەردىڭ ساپاسىن ارتتىرۋ ماقساتىندا ۋاكىلەتتى جانە مۇددەلى مەملەكەتتىك ورگاندار شارالار قابىلدادى. جۇرگىزۋشىلەردىڭ ءوز بەتىنشە دايىندالۋىن جانە ونلاين وقۋىن الىپ تاستادىق. اۆتومەكتەپتەردى جانە ۇمىتكەرلەردى تىركەۋ ىشكى ىستەر مينيسترلىگىنىڭ اقپاراتتىق جۇيەسىندە جۇرگىزىلىپ وتىرادى. بۇل ۇمىتكەرلەرگە وقۋ كۋرستارىن اياقتاۋ تۋرالى كۋالىكتەردى مەرزىمىنەن بۇرىن بەرۋ جانە ولاردى قولدان جاساۋ مۇمكىندىگىن بولدىرمايدى. وقۋ كۋرسىن اياقتاعانى تۋرالى كۋالىكتى ەلەكتروندىقق نۇسقاعا تولىق كوشىرۋ بويىنشا جۇمىس اتقارىلۋدا. ول ءوز كەزەگىندە جالعان كۋالىك الۋدى نەمەسە ولاردى فورمالدى تۇردە الۋدى بولدىرمايدى»، - دەدى اكىمشىلىك پوليتسيا كوميتەتىنىڭ ءتوراعاسى.

ايتا كەتەيىك، ەلىمىزدە «جاسىرىن پاترۋل» جۇيەسى ەنگىزىلىپ جاتىر.

سونداي-اق، بۇدان بىلاي ادام تاسىمالىمەن تەك جەكە تاسىمالداۋشى رەتىندە تىركەلگەن تۇلعالار عانا اينالىسا الاتىن بولادى.

ودان بولەك، ارنايى تانۋ بەلگىسىن تاقپاعان ەلەكتروموبيل جۇرگىزۋشىلەرىنە قانشا سومادا ايىپپۇل سالىناتىنىن جازعان ەدىك.

ەندى ەلىمىزدە زياندى ءتۇتىن شىعاراتىن كولىكتەر كامەرا ارقىلى انىقتالماق.

اۆتور

ەربول جانات