جۋرناليستەر بەيبىت ميتينگ كەزىندە قالاي جۇمىس ىستەۋ كەرەك - مينيستر بۇيرىعى

استانا. KAZINFORM - مادەنيەت جانە اقپارات ءمينيسترىنىڭ 2025 -جىلعى 1-ساۋىردەگى بۇيرىعىمەن بەيبىت شەرۋگە قاتىساتىن جۋرناليستىڭ (بۇقارالىق اقپارات قۇرالدارى وكىلى) قىزمەتىن جۇزەگە اسىرۋ قاعيدالارى بەكىتىلدى.

مينيسترلىكتىڭ بيىل 15-ساۋىردەن باستاپ كۇشىنە ەنەتىن بۇيرىعىنا سايكەس، بەيبىت جينالىستاردا اقپارات جيناۋ، وڭدەۋ، حابار جانە ماتەريال دايىنداۋ كەزىندە جۋرناليست وزىمەن بىرگە قىزمەتتىك كۋالىگىن الىپ جۇرۋگە جانە ارنايى كيىم كيۋگە مىندەتتى.

ناقتى ايتقاندا:

- حابارلار مەن ماتەريالداردى جيناۋ، وڭدەۋ جانە دايىنداۋدى جۇزەگە اسىرادى، اقپاراتتى سۇراتادى، الادى جانە تاراتادى؛

- كولىك قوزعالىسىنا، ينفراقۇرىلىم نىساندارىنىڭ جۇمىسىنا، مۇلىكتىڭ ساقتالۋىنا كەدەرگى كەلتىرەتىن، سونداي-اق بەيبىت جينالىسقا قاتىسپايتىن ازاماتتاردىڭ ەركىن قوزعالىسىنا توسقاۋىل بولاتىن ارەكەتتەر جاسامايدى؛

- بەيبىت جينالىستار ۇيىمداستىرۋشىسىنىڭ، قاتىسۋشىلارىنىڭ جانە مەملەكەتتىك ورگاندار مەن ۇيىم قىزمەتكەرلەرىنىڭ زاڭدى ارەكەتتەرىنە كەدەرگى جاسامايدى.

جۋرناليستەردىڭ كاسىبي قىزمەتىن قامتاماسىز ەتۋ ماقساتىندا جەرگىلىكتى اتقارۋشى ورگان بۇقارالىق اقپارات قۇرالدارىنىڭ سۇرانىسى بويىنشا جەدەل باسپا ءسوز ورتالىعىمەن قامتاماسىز ەتەدى.

جەدەل باسپا ءسوز ورتالىعى كەلەسى تالاپتارعا سايكەس بولۋى ءتيىس:

- ارنايى قورشالۋى؛

- فوتو، ۆيدەوعا ءتۇسىرۋ جانە سۇحبات الۋ مۇمكىندىگىن قامتاماسىز ەتۋ؛

- ەلەكتر قۋاتىمەن قامتاماسىز ەتىلۋى؛

- ءومىرى مەن دەنساۋلىعىنا ءقاۋىپ تونگەن جاعدايدا ىشكى ىستەر ورگاندارى قىزمەتكەرلەرىنىڭ جەدەل ارەكەت ەتۋى ارقىلى جۋرناليستەردىڭ قاۋىپسىزدىگىن قامتاماسىز ەتۋى.

جۋرناليست بەيبىت جينالىستاردا اقپارات جيناۋ، وڭدەۋ، دايىنداۋ قىزمەتىن جەدەل باسپا ءسوز ورتالىعى اۋماعىندا دا، ودان تىس جەرلەردە دە جۇزەگە اسىرا الادى.

سونداي-اق جەرگىلىكتى اتقارۋشى ورگان بەيبىت جينالىس كەزىندە ءوز وكىلىنىڭ قاتىسۋىن قامتاماسىز ەتەدى. ول جۋرناليستەردى جەدەل باسپا ءسوز ورتالىعىنا ەرتىپ بارۋ، ۇيىمداستىرۋشىلار مەن قاتىسۋشىلاردان سۇحبات، تۇسىنىكتەمە الۋعا كومەكتەسۋ، سونداي-اق جۋرناليستەردىڭ قاۋىپسىزدىگىن قامتاماسىز ەتۋگە باعىتتالعان شارالاردى ءتۇسىندىرۋ جۇمىستارىن جۇرگىزۋگە جاۋاپتى.

جۋرناليستەردىڭ بەيبىت جيىنداعى فورماسى:

- اشىق كوك ءتۇستى جيلەت؛

- بەلگىلەيتىن تاڭعىش (قولعا تاعادى)؛

- جاپسىرما (كەۋدەشە).

اتالعان ايىرىم بەلگىلەرىن كيگەن كەزدە ولاردىڭ انىق كورىنۋى قامتاماسىز ەتىلۋى قاجەت.

جيلەتتە كولدەنەڭىنەن ەنى كەمىندە 20 ميلليمەتر بولاتىن جولاق تىگىلەدى (الدىندا جانە ارقاسىندا). سول جولاقتاردىڭ ۇستىڭگى بولىگىندە «PRESS» دەگەن جازۋ ورنالاستىرىلادى. جازۋ لاتىن ارىپتەرىمەن، Arial قارپىمەن، اق نەمەسە كۇمىس ءتۇستى شاعىلىستىرعىش ماتادان جاسالادى. تاڭعىش - اشىق سارى ءتۇستى، ۇستىندە «PRESS» دەگەن جازۋ بولادى.

ەسكە سالا كەتسەك، مەملەكەت باسشىسى قاسىم- جومارت توقايەۆ 2022 -جىلعى قاڭتار وقيعاسى جايلى: «بەيبىت شەرۋ مەن قاراقشىلاردىڭ قاندى قىلمىسىنىڭ اراسىن اجىراتا ءبىلۋ كەرەك» دەگەن ەدى.