جۋرناليست مۇحتار تۇمەنباي دۇنيەدەن ءوتتى

استانا. KAZINFORM - بەلگىلى جۋرناليست مۇحتار تۇمەنباي 55 جاسقا قاراعان شاعىندا قايتىس بولدى.

مۇحتار تۇمەنباي 1970 -جىلى 11- تامىزدا دۇنيەگە كەلگەن. ول- بەلگىلى جازۋشى جاقسىلىق تۇمەنبايەۆتىڭ ۇلى. ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم العان. ەڭبەك جولىندا ءبىرقاتار باسىلىم مەن رەسپۋبليكالىق تەلەارنالاردا قىزمەت اتقارعان. «Qazaqstan» تەلەارناسىنداعى «اپتا» اقپاراتتىق-ساراپتامالىق باعدارلاماسىنىڭ جۇرگىزۋشىسى بولدى. سونداي-اق ول «مانشۇك. اكەگە اراشا تۇسكەن قىز»، «ءتورت قايسار»، «ءاليا. ەرلىك الگوريتمى» سىندى سوعىس قاھارماندارىنا ارنالعان دەرەكتى فيلمدەردىڭ اۆتورى.

مادەنيەت جانە اقپارات مينيسترلىگى بەلگىلى جۋرناليست، جازۋشى، وتاندىق اقپارات كەڭىستىگىندە ءوز قولتاڭباسىن قالدىرعان تۇلعا مۇحتار تۇمەنبايدىڭ دۇنيەدەن وزۋىنا بايلانىستى وتباسى مەن تۋعان-تۋىستارىنا، بارشا ارىپتەستەرىنە قايعىرا كوڭىل ايتتى.

- مۇحتار جاقسىلىق ۇلى - ءوزىنىڭ شىعارماشىلىعى مەن ازاماتتىق ۇستانىمىمەن ەل ەسىندە قالعان تۇلعا ەدى. ول قازاق جۋرناليستيكاسىنىڭ دامۋىنا سۇبەلى ۇلەس قوسىپ، تالاي ماڭىزدى باعدارلامالار مەن دەرەكتى فيلمدەردىڭ اۆتورى اتاندى. اسىرەسە، «اپتا» اقپاراتتىق- ساراپتامالىق باعدارلاماسى ارقىلى ەلدەگى ماڭىزدى وقيعالارعا تەرەڭ تالداۋ جاساپ، كورەرمەننىڭ قۇرمەتىنە بولەندى. سونداي-اق، تاريحي- پاتريوتتىق دەرەكتى فيلمدەرى جاس ۇرپاقتىڭ بويىنا وتانسۇيگىشتىك رۋح دارىتىپ، ەل تاريحىن ۇمىتپاۋعا ۇندەدى. ارداقتى ازاماتتىڭ ادامدىق بولمىسى، كاسىبي بىلىكتىلىگى - كەيىنگى بۋىن قالام ۇستاعان جاستارعا ءاردايىم ۇلگى بولىپ قالا بەرمەك. مارقۇمنىڭ جاتقان جەرى جايلى، توپىراعى تورقا بولسىن! اللانىڭ راقىمى مەن مەيىرىمى جولداس بولىپ، رۋحى پەيىشتە شالقىسىن، - دەلىنگەن مينيسترلىك حابارلاماسىندا.