جەر زاڭىن بۇزعاندارعا 500 ميلليون تەڭگە ايىپپۇل سالىندى

استانا. قازاقپارات - 2024 -جىلى جەر رەسۋرستارىن باسقارۋ جونىندەگى كوميتەت جۇرگىزگەن تەكسەرۋلەردىڭ قورىتىندىسى بويىنشا 3,7 مىڭ اكىمشىلىك ءىس قوزعالىپ، 500 ميلليون تەڭگە ايىپپۇل سالىنعان.

- 2024 -جىلى جەر رەسۋرستارىن باسقارۋ جونىندەگى كوميتەتتىڭ اۋماقتىق بولىمشەلەرى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ، جەر قۇقىقتىق قاتىناستارى سۋبەكتىلەرىنىڭ، جەرگىلىكتى اكىمدىكتەر مەن فيليالدارىنىڭ ۇستىنەن 6,5 مىڭعا جۋىق تەكسەرۋ جۇرگىزدى. تەكسەرۋ قورىتىندىلارى بويىنشا جەر زاڭناماسىن بۇزۋدىڭ 5,3 مىڭعا جۋىق فاكتىسى بەلگىلى بولدى. 3,7 مىڭعا جۋىق اكىمشىلىك ءىس قوزعالىپ، 500 ميلليون تەڭگەگە جۋىق سوماعا ايىپپۇل سالىندى، - دەلىنگەن پرەمەر-ءمينيستردىڭ جاۋابىندا.

جاۋاپتاعى مالىمەتكە سۇيەنسەك، كوبىنەسە مەملەكەت مەنشىگىندەگى جەرگە قول سۇعۋ، اۋىلشارۋاشىلىق القاپتاردى ءتيىمسىز پايدالانۋ نەمەسە پايدالانباۋ، بەرىلگەن تەلىمنىڭ قولدانىس ماقساتىن بۇزۋ، جەرگە يەلىك ەتۋ قۇقىعىن بەرۋدە زاڭ بۇزۋ، مەملەكەتتىك جەر كاداسترىن جۇرگىزۋدىڭ قاتەلىكتەرى، جەردى جارامسىز كۇيگە ءتۇسىرۋ سياقتى زاڭ بۇزۋ فاكتىلەرى تىركەلگەن.

دەپۋتاتتىق ساۋالدا سولتۇستىك قازاقستان، الماتى، پاۆلودار، شىعىس قازاقستان وبلىستارىندا جەر زاڭناماسىن ورەسكەل بۇزۋدىڭ فاكتىلەرى كورسەتىلگەن. ولجاس بەكتەنوۆ اتالعان زاڭسىزدىقتارعا جاۋاپتى ادامداردىڭ ءبارى اكىمشىلىك جاۋاپكەرشىلىككە تارتىلعانىن ايتادى.

ەسكە سالساق، الماتى وبلىسى ەڭبەكشىقازاق اۋدانىندا ادامداردى «جەر الىپ بەرەمىن» دەپ الداعان 62 جاستاعى ايەل ۇستالعان ەدى.