جەر سىلكىنىسى: تاجىكستاندا 100 گە جۋىق ءۇي قيراپ، ءبىر بالا كوز جۇمدى

استانا. قازاقپارات - 13-ساۋىردە ەلدە بولعان جەر سىلكىنىسى سالدارىنان تاجىكستاننىڭ ەكى اۋدانىندا 100 گە جۋىق تۇرعىن ءۇي قيراپ، تاعى بىرنەشە ونداعان عيمارات زاقىمدانىپ، ءبىر بالا قازا تاپتى. بۇل تۋرالى ەلدەگى توتەنشە جاعدايلار جانە ازاماتتىق قورعانىس كوميتەتىنىڭ (ت ج ك) داعدارىستى باسقارۋ ورتالىعى حابارلادى، دەپ جازادى تاسس.

حابارلامادا راشت ايماعىنىڭ بەس اۋىلىندا 40 تۇرعىن ءۇي تولىعىمەن قيراعانى، 5 تۇرعىن ءۇي، 3 شايحانا جانە 1 قوسالقى مەكتەپ عيماراتى جارتىلاي قيراعاندىعى اتاپ كورسەتىلگەن.
سونىمەن قاتار، ءۇشتۇرپاست اۋىلىندا ءۇش جاسار بالانى ءۇيدىڭ قابىرعاسى باسىپ قالىپ، مەرت بولعان.

ايتا كەتەيىك، 13-ساۋىردە تاجىكستاندا ەكى رەت جەر سىلكىنگەن. العاشقىسى جەرگىلىكتى ۋاقىت بويىنشا 09:24 تە تىركەلدى. ماگنيتۋداسى 5,8. ونىڭ كورشىلەس وزبەكستان اۋماعىنا اسەر ەتكەنى، تاشكەنتتە 2 باللدىق كۇشپەن جەراستى دۇمپۋلەرى سەزىلگەنى ايتىلدى.

ەكىنشى جەر سىلكىنىسى جەرگىلىكتى ۋاقىت بويىنشا 12:14 تە بولدى. EMSC ماماندارى جەر سىلكىنىسىنىڭ ماگنيتۋداسىن 4,2 دەپ باعالادى.

ەۋروپا- جەرورتا تەڭىزى سەيسمولوگيالىق ورتالىعى (EMSC) 14-ساۋىرگە قاراعان ءتۇنى، UTC 0:44 (قازاقستان ۋاقىتىمەن 5:44) كەزىندە تاجىكستاندا ماگنيتۋداسى 4,5 بالدىق تاعى ءبىر جەر سىلكىنىسى تىركەلگەنىن مالىمدەدى.

بۇعان دەيىن تاجىكستانداعى جەر سىلكىنىسىنەن 29 ءۇي مەن مەكتەپ زاقىمدانعانىن جازدىق.

اۆتور

جاراسقان نۇرىبايەۆ