جەر ءۇيدى ساقتاندىرۋ مىندەتتى بولا ما
استانا. KAZINFORM - قازاقستاندا 2026 -جىلدان باستاپ تۇرعىن ءۇيدى تابيعي اپاتتاردان مىندەتتى ساقتاندىرۋ جۇيەسى ەنگىزىلۋى مۇمكىن. قازىر باسپانانى ساقتاندىرۋدىڭ ەرىكتى ءتۇرى عانا بار. ەرىكتى بولعاندىقتان ەكىنىڭ ءبىرى ءۇيىن جەكە كومپانيالارعا سەنىپ ساقتاندىرۋعا دايىن ەمەس. مەملەكەت وسى جۇيەنى جەتىلدىرۋدى كوزدەپ وتىر.
رەسمي دەرەككە سۇيەنسەك، ەل اۋماعىنىڭ 75 پايىزى جەر سىلكىنىسى، تاسقىن، ورمان ءورتى سياقتى تابيعي اپاتتار قاۋپى جوعارى ايماققا جاتادى. 2024 -جىلى توتەنشە جاعدايلاردان كەلگەن شىعىن 460 ميلليارد تەڭگەگە جەتىپ، 2023 -جىلمەن سالىستىرعاندا 2,6 ەسە وسكەن. سوعان قاراماستان، ەلىمىزدەگى تۇرعىن ءۇي قورىنىڭ نەبارى 3,2 پايىزى عانا ساقتاندىرىلعان. سەيسميكالىق بەلدەۋدە دەلىنەتىن الماتىنىڭ وزىندە بۇل كورسەتكىش - 7,7 پايىز.
ەرىكتى ساقتاندىرۋدىڭ ءوزى يپوتەكا ءۇشىن عانا
قازىرگى زاڭ بويىنشا تۇرعىن ءۇيدى ساقتاندىرۋ مۇلىكتى ەرىكتى ساقتاندىرۋ تارتىبىمەن ىسكە اسادى. جۇمىس ىستەپ تۇرعان 25 ساقتاندىرۋ ۇيىمىنىڭ 15 ىندە عانا ءتيىستى ليتسەنزيا بار. كوپ جاعدايدا ازاماتتار ساقتاندىرۋدى بانكتىڭ تالابى بويىنشا راسىمدەيدى، اسىرەسە يپوتەكا العاندا وسىلاي. مۇنداي شارتتاردىڭ 96 پايىزى بانك تالابىمەن جاسالادى، ال شىنىمەن ساقتىق ءۇشىن دەپ ساقتاندىرۋعا جۇگىنەتىندەر تىم از.
ەرىكتى ساقتاندىرۋدىڭ ارتىقشىلىعى تاڭداۋ ەركىندىگىندە. ازامات تەك ءورت، سۋ باسۋ سياقتى اپاتتار مەن بوگدە ادامداردىڭ ارەكەتىنەن عانا ەمەس، بارلىق مۇمكىن قاۋىپ-قاتەردەن ساقتاندىرۋ فۋنكتسياسىن تاڭداي الادى. باعاسىنا قاراي اۋقىمى قۇبىلىپ وتىرادى.
ساقتاندىرۋ قۇنىنا نە كىرەدى؟
باسپانا قۇنى - قىمبات مۇلىككە ساقتاندىرۋ تولەمى دە جوعارى.
ايماقتىڭ قاۋىپتىلىك دەڭگەيى - سەيسميكالىق قاۋىپ بار وڭىرلەردە تاريف جوعارى.
ءۇيدىڭ سالىنعان جىلى مەن تەحنيكالىق جاعدايى.
ساقتاندىرۋدىڭ كولەمى - بازالىق نەمەسە كەڭەيتىلگەن پوليس.
فرانشيزا - توتەنشە جاعدايدا ءوز ەسەبىنەن جابىلاتىن سوما.
مىسالى، نارىقتىق قۇنى 30 ميلليون تەڭگە بولاتىن پاتەرگە ساقتاندىرۋ جىلىنا 24 مىڭنان 90 مىڭ تەڭگەگە دەيىن جەتۋىمۇمكىن.
2026 -جىلى نە وزگەرەدى؟
ۇكىمەت ازىرلەپ جاتقان زاڭ جوباسى بويىنشا، 2026 -جىلدان باستاپ بۇكىل تۇرعىن ءۇي يەلەرى ءۇشىن تابيعي اپاتتاردان مىندەتتى ساقتاندىرۋ ەنگىزىلەدى.
جۇيە قالاي جۇمىس ىستەيدى؟
مەملەكەتتىك ساقتاندىرۋ ۇيىمى (م س ۇ) وپەراتور رەتىندە جۇمىس ىستەيدى. بۇل ساقتاندىرۋ قورىنىڭ ءوزىن حالىقارالىق دەڭگەيدە ساقتاندىرۋعا مۇمكىندىك بەرەدى.
جىلدىق تولەمنىڭ مولشەرى مۇلىك سالىعىنا بايلانىستى بولادى - بازالىق جارنا - 1000 تەڭگەدەن 20000 تەڭگەگە دەيىن.
بۇل جارنا ايماقتىڭ قاۋىپ-قاتەر دەڭگەيىنە قاراي وزگەرۋى مۇمكىن.
جەر سىلكىنىسى مەن ورتكە ءتوزىمدى ەتىپ سالىنعان باسپاناعا جەڭىلدەتىلگەن جارنا قاراستىرىلعان.
مەملەكەت الەۋمەتتىك تۇرعىدان وسال توپتارعا جارنانى تولىق نەمەسە ءىشىنارا وتەپ بەرەدى.
ساقتاندىرۋ شارتى قانداي قاتەرلەرگە جۇرەدى:
جەر سىلكىنىسى
تاسقىن
سەل
تابيعي ورمان ءورتى.
ساقتاندىرۋ نە بەرەدى؟
اپات بولعان جاعدايدا باستاپقى كەزەڭدە جەدەل كومەك رەتىندە وتەماقى قاراستىرىلعان. مولشەرى - تولەگەن جارنانىڭ 500 ەسەسى.
1000 تەڭگە تولەگەندەرگە - 500000 تەڭگە،
20000 تەڭگە تولەگەندەرگە - 10 ميلليون تەڭگە.
بۇل جۇيە كەيىن ءۇيدى جوندەۋ مەن جاڭا باسپانا الۋعا مۇمكىندىك بەرەدى.
باسپانانى مىندەتتى ساقتاندىرۋ قاي وڭىرلەرگە اۋاداي قاجەت؟
توتەنشە جاعدايلار مينيسترلىگىنىڭ مالىمەتى بويىنشا ەلدە سەل مەن تاسقىن قاۋپى بار 2 رەسپۋبليكالىق ماڭىزداعى قالا مەن 6 وبلىس بار.
سەيسميكالىق قاۋىپ بار ايماقتار - 2 قالا مەن 13 وبلىس؛
قاۋىپ دەڭگەيى تومەن وڭىرلەر: استانا قالاسى، اقمولا، قوستاناي، پاۆلودار جانە س ق و.
ايتا كەتسەك، پرەمەر-ءمينيستردىڭ ورىنباسارى قانات بوزىمبايەۆ تابيعي اپاتتار تاۋەكەلدەرىن باسقارۋ جانە قارجىلاندىرۋ جۇيەسىن جەتىلدىرۋ ماسەلەلەرى بويىنشا كەڭەس وتكىزدى.
اۆتور
ەسىمجان ناقتىباي
