جەننيفەر لوپەستىڭ كونسەرتىنە قۋانا-قۋانا بارامىن - بالايەۆا سۇيىكتى ارتىستەرى تۋرالى ايتىپ بەردى

استانا. KAZINFORM - مادەنيەت جانە اقپارات ءمينيسترى ايدا بالايەۆا بيزنەستىڭ شەتەلدىك جۇلدىزدار كونسەرتتەرىن ۇيىمداستىرا باستاعانىن جانە ولارعا بارىنشا قولداۋ كورسەتىلەتىنىن ايتتى.

ۇكىمەت ۇيىندە مينيستر شەتەلدىك جۇلدىزدار كونسەرتتەرىن ۇيىمداستىراتىن كوممەرتسيالىق ۇيىمداردىڭ بار ەكەنى قۋانتاتىنىن ايتتى. بۇل ءسوزسىز قازاقستاننىڭ شەتەلدە تانىمال بولۋىنا اسەر ەتەدى.

- مينيستر رەتىندە مەنى بيزنەستىڭ وسى ۇيىمداستىرۋمەن اينالىساتىنى قۋانتادى جانە ءبىز بۇل باستامالاردى بارىنشا قولدايمىز. ارينە، بىزدە ونداي قاراجات جوق، سوندىقتان ولاردىڭ باستامالارىنا قولداۋ كورسەتەمىز. مەن جەننيفەر لوپەستىڭ كونسەرتىنە بارعىم كەلەدى. سەبەبى، ونىڭ ۇلكەن اۋديتورياسى بار، ءارى بۇكىل الەم مويىنداعان تالانتى بار. كونسەرتتى كورگىم كەلەدى، سول ءۇشىن بيلەت ساتىپ الدىم جانە بالالارىممەن بىرگە بارۋدى جوسپارلاپ وتىرمىن، - دەدى ايدا بالايەۆا.

سونىمەن بىرگە، تىلشىلەر ءمينيستردىڭ تاعى قانداي ارتىستەردىڭ كونسەرتىنە بارعىسى كەلەتىنىن سۇرادى.

- ونداي ورىنداۋشىلار وتە كوپ. مىسالى، شاكيرانى كورۋگە بولار ەدى نەمەسە مەنىڭ سۇيىكتى ءانشىم لارا فابياندى كورگىم كەلەدى. سوندىقتان، ەلىمىزدە وسىنداي كونسەرتتەر كوبىرەك وتسە ەكەن دەيمىن. نەگە ينۆەستيسيا تارتتىڭدار دەپ سىنايتىن ادامدار دا بار. ءبىراق بۇل شىن مانىندە مۋلتيپليكاتيۆتى اسەر بەرەدى، ويتكەنى ورىنداۋشىلاردىڭ جانكۇيەرلەرى قازاقستانعا كەلىپ، قوناق ۇيلەرىمىزدە تۇرادى، مادەني مەكەمەلەرىمىزگە، مەيرامحانالارىمىزعا بارادى، ال بۇل قارجى سالىق رەتىندە ەلىمىزدە قالادى. سوندىقتان مۇنداي ىسكەر ادامداردىڭ باستامالارىن تەك قولداۋ كەرەك، - دەدى ايدا بالايەۆا.

بۇعان دەيىن استانا مەن الماتىداعى مۋزىكالىق ءىس-شارالار افيشاسى جاريالانعان ەدى.

ال 1-تامىزدا امەريكالىق اكتريسا ءارى ءانشى جەننيفەر لوپەس «Up All Night» تۋرى اياسىندا «استانا ارەنادا» ونەر كورسەتەدى.

اۆتور

ايجان سەرىكجان قىزى