جۇمىسقا قابىلداۋ باستالدى: ل ر ت جۇيەسىنە قىزمەتكەرلەر ىرىكتەلۋدە

استانا. قازاقپارات - «City Transportation Systems» ج ش س استاناداعى جەڭىل رەلستى كولىك (LRT) جۇيەسىندە جۇمىس ىستەۋ ءۇشىن قىزمەتكەرلەردى قابىلداۋ باستالعانىن حابارلادى.

كومپانيا تومەندەگى لاۋازىمدارعا ۇمىتكەرلەر ىزدەيدى:

1. ستانسيالاردىڭ اۋىسىم باسشىلارى؛

2. ستانسيا كەزەكشىلەرى؛

3. جىلجىمالى قۇرام ورتالىعىنىڭ قوزعالىس ديسپەتچەرلەرى؛

4. جىلجىمالى قۇرام ورتالىعىنىڭ ورتالىقتاندىرۋ بەكەتىنىڭ ديسپەتچەرلەرى؛

5. ل ر ت جابدىقتارى مەن ينفراقۇرىلىمىن باسقارۋ ورتالىعىنىڭ ديسپەتچەرلەرى؛

6. دابىل تەحنيكتەرى؛

7. بايلانىس تەحنيكتەرى؛

8. ەلەكتر مونتەرلەرى؛

9. جول جوندەۋ ۋچاسكەسىنىڭ شەبەرلەرى؛

10. جابدىقتاردى جوندەۋ سلەسارلارى؛

11. قويما مەڭگەرۋشىلەرى.

- LRT جۇيەسىندە جۇمىس ىستەيتىن بولاشاق مامانداردى وقىتۋ جۇمىس بەرۋشى ەسەبىنەن جۇرگىزىلەدى. تەوريالىق جانە پراكتيكالىق دايىندىق قازاقستاندا جانە قىتاي حالىق رەسپۋبليكاسىندا وتەدى. كۋرستىڭ ۇزاقتىعى ماماندىققا بايلانىستى 4-6 ايدى قۇرايدى.

باعدارلاما اياقتالعان سوڭ قاتىسۋشىلارعا حالىقارالىق ۇلگىدەگى سەرتيفيكات تابىستالىپ، بارلىعى LRT بولىمشەلەرىنە جۇمىسقا ورنالاستىرىلادى، - دەلىنگەن اقپاراتتا.

ۇمىتكەرلەرگە قويىلاتىن تالاپتار:

- كولىك، ماشينا جاساۋ، ەلەكتر تەحنيكاسى نەمەسە ءتيىستى سالالار بويىنشا جوعارى نەمەسە ورتا- ارناۋلى ءبىلىم؛

- كەمىندە 2 جىل جۇمىس تاجىريبەسى.

تولىق بىلىكتىلىك تالاپتارى cts.gov.kz سايتىندا جاريالانعان. تۇيىندەمەلەر وسى سايت ارقىلى قابىلدانادى.

ايتا كەتەيىك، استانادا LRT جەلىسى قوسشىعا قاراي ۇزارتىلادى.