جۇمىسشى ماماندىق يەلەرىنە قاي سالادا كوپ ايلىق تولەيدى

استانا. KAZINFORM - پرەمەر-ءمينيستردىڭ ورىنباسارى ەرمەك كوشەربايەۆ سەناتتا ءوتىپ جاتقان پارلامەنتتىك تىڭداۋدا جۇمىسشى ماماندىق يەلەرىنىڭ ايلىعى تۋرالى دەرەكتەر كەلتىردى.

- قازىرگى تاڭدا كاسىپتىك- تەحنيكالىق ءبىلىمى بار مامانداردىڭ ەڭ كوپ سانى ساۋدادا ءجۇر - 856 مىڭ ادام. ونەركاسىپتە 670 مىڭ، اۋىل شارۋاشىلىعىندا 559 مىڭ، كولىك جانە قويما سالاسىندا 419 مىڭ ادام كاسىپتىك- تەحنيكالىق ءبىلىمى بويىنشا ەڭبەك ەتىپ ءجۇر. جۇمىسشى كاسىپتەر اراسىندا ورتاشا جالاقىنىڭ جوعارى دەڭگەيى ونەركاسىپتە - 588 مىڭ تەڭگە. قارجى سالاسىندا 531 مىڭ تەڭگە جانە كولىك سالاسىندا 403 مىڭ تەڭگە، - دەدى ول.

ۆيتسە-پرەمەر ەل ەكونوميكاسىندا 2,4 ميلليون ازامات جۇمىسشى ماماندىقتان نەسىبەسىن ايىرىپ جۇرگەنىن اتاپ ءوتتى.

- ازاماتتاردى جۇمىسپەن قامتۋدىڭ وسۋىنە كاسىپتىك- تەحنيكالىق دايارلىق ىقپال ەتەدى. سوڭعى 10 جىلدا كاسىپتىك- تەحنيكالىق ءبىلىم بار قىزمەتكەرلەردىڭ ۇلەسى جۇمىسپەن قامتىلعان جالپى حالىقتىڭ 49 پايىزىنا جەتتى. ءوسىم - 17 پايىز. 2030 -جىلعا دەيىنگى بولجامدار بويىنشا، 1,8 ميلليون جاس قازاقستاندىق ەڭبەك نارىعىنا شىعادى. ولاردى قاجەتتى داعدىلارعا باۋلۋ ماڭىزدى. ەلىمىزدىڭ ءبىرقاتار وڭىرىندە ەڭبەككە قابىلەتتى حالىقتىڭ، اسىرەسە جاستاردىڭ كەتۋى بايقالىپ وتىر. بۇل ستراتەگيالىق ماڭىزدى سالالاردا جۇمىس كۇشىنىڭ جەتىسپەۋىنە اكەلەدى، - دەدى ەرمەك كوشەربايەۆ.

ەسكە سالساق، شىعىس قازاقستان وبلىسىنداعى توعىز كاسىپورىن 304 جۇمىسشىسىنا 150 ميلليون تەڭگە جالاقى تولەمەگەنى ءمالىم بولعان ەدى.

اۆتور

ەسىمجان ناقتىباي